Prezident «Aqorda» rezidentsiiasynda elimizdiń biznes-qoǵamdastyǵy ókilderimen kezdesý ótkizdi, dep habarlaidy "Ult aqparat".
Qasym-Jomart Toqaev memleketti odan ári damytý jolyndaǵy otandyq kásipkerliktiń rólin talqylaý búgingi is-sharanyń negizgi maqsaty ekenin atap ótti.
– Qazaqstan halqyna Joldaýymda ekonomikalyq saiasatymyzdyń negizgi maqsaty – búkil elimizdiń ál-aýqatyn sapaly jáne inkliýzivti túrde jaqsartý isi ózgermeitinin erekshe atap óttim. Bul maqsatqa erkin ári tiimdi naryqtyq ekonomika qurý arqyly ǵana qol jetkizýge bolady. Memlekettiń ekonomikadaǵy jetekshi róli, ásirese memlekettiń biznes isine aralasýy kelmeske ketedi jáne solai bolýǵa tiis. Memlekettiń mindeti – zańǵa baǵynatyn bizneske el ishinde de, halyqaralyq naryqta da qoldaý kórsetý, – dedi Memleket basshysy.
Onyń aitýynsha, ekonomikany monopoliiadan aryltý jáne jańa naryqtar ashý jumystary jalǵasady.
– Básekelestik jaǵdaiy teńestiriledi. Endi qandai da bir tulǵaǵa basymdyqtar berilmeidi. Memlekettik apparattaǵy bailanystary men onyń tarapynan jasalatyn qamqorlyqqa qaramastan, Qazaqstanda adal biznespen ainalysý kez kelgen adamǵa tiimdi jáne qaýipsiz bolýǵa tiis. Bul – negizgi ustanym. Biz shaǵyn jáne orta biznesti damytamyz. Kásipkerlerdiń jańa býynyn ósirýge, jańa ideialar men oi-pikirlerdi qoldaýǵa basa mán beremiz. Sonymen qatar memleket iri, qalyptasqan biznesti qoldaýdan bas tartpaidy. Kerisinshe, biz, eń aldymen, sizderdi Ádiletti Qazaqstan qurýǵa belsene atsalysýǵa shaqyramyz, – dedi Memleket basshysy.
Qasym-Jomart Toqaev biznes ókilderine osy maqsattarǵa jetý úshin birqatar sheshim qabyldanatynyn jetkizdi. Atap aitqanda, salyq saiasaty men salyq ákimshiligi túbegeili qaita qaralady.
– 2024 jyly jańa Salyq kodeksi kúshine enedi. Ony ázirleýge biznes tikelei qatysady. Bul – meniń Úkimetke bergen tapsyrmam. 2024 jyldan «basynan bastap retteý» júiesi iske qosylady. Bul biznesti artyq ákimshilik qysymnan bosatady. Memlekettik satyp alý tásilderi men memlekettik-jekemenshik áriptestik modeli tolyǵymen qaita qaralyp, jer qoinaýyn paidalaný jónindegi zańnama jetildiriledi, – dedi Qasym-Jomart Toqaev.
Prezident salalyq saiasatyn, onyń ishinde agroónerkásip keshenin, qurylys salasyn, kólik-logistika sektoryn damytýǵa qatysty ádisterdi qaita qaraý mańyzdy dep sanaidy.
– Bizdiń aldymyzda biliktiń, qoǵam men biznestiń kúshin biriktirý arqyly ǵana oryndaýǵa bolatyn orasan zor mindet tur. Oǵan qosa, 21 qańtarda ótken kezdesý barysynda men aitqan memleket pen biznestiń ózara is-áreket qaǵidattary ózgermeitinin taǵy da naqtylaimyn. Esterińizge sala keteiin, bul – adal básekelestik, qabyldanatyn sheshimderdiń ashyqtyǵy, memlekettik saiasattyń boljamdylyǵy, biznestiń salyqqa adaldyǵy, kásipkerlerdiń áleýmettik jaýapkershiligi, – dedi Memleket basshysy.
Qasym-Jomart Toqaev iri biznes ókilderin qoǵamdy tolǵandyratyn áleýmettik máselelerdi sheshýde shet qalmaýǵa shaqyrdy.
– Adami kapitalǵa, atap aitqanda, zamanaýi balabaqshalar, jaily mektepter, aýrýhanalar, irgeli ýniversitetter salýǵa, týrizmdi damytýǵa investitsiia quiý da mańyzdy. Sizder qaiyrymdylyq ister jasaýdy jalǵastyra beretinderińizge senimdimiz. Qazir elimizde mektepterdiń, stýdentter jataqhanalarynyń, jastarǵa arnalǵan sport ǵimarattarynyń tapshylyǵy seziledi. Sizderdiń kómekterińiz el úshin eleýli bolar edi, – dedi Prezident.
Jiyn sońynda Memleket basshysy bilik pen biznes arasyndaǵy konstrýktivti dialogty jalǵastyrýdyń mańyzdy ekenin atap ótti.
