Qasym-Jomart Toqaev Reformalar jónindegi joǵary keńestiń otyrysyn ótkizdi, dep habarlaidy "Ult aqparat" Aqordaǵa silteme jasap.
Reformalar jónindegi joǵary keńestiń kezekti otyrysynda memlekettik josparlaý júiesin qaita qurý ádisteri qarastyrylyp, makroekonomikalyq saiasat, áleýmettik salany damytý, ekonomikany ártaraptandyrý jáne biznesti retteý, sot jáne quqyq qorǵaý júielerin reformalaý, memlekettik basqarý jáne memlekettik qyzmet kórsetý jónindegi konsýltativtik komitetterdiń jetekshileri baiandama jasady.
Jiynda Reformalar jónindegi joǵary keńestiń músheleri: Strategiialyq josparlaý jáne reformalar agenttiginiń tóraǵasy Qairat Kelimbetov, Prezidenttiń keńesshisi – Reformalar jónindegi joǵary keńes tóraǵasynyń orynbasary ser Sýma Chakrabarti, Premer-Ministr Asqar Mamin, Prezident Ákimshiliginiń Basshysy Erlan Qoshanov, Prezident Ákimshiligi Basshysynyń orynbasary Timýr Súleimenov, «Atameken» Ulttyq kásipkerler palatasy prezidiýmynyń tóraǵasy Timýr Qulybaev sóz sóiledi.
Memleket basshysy óz sózinde memlekettik josparlaýdyń jańa júiesi baǵdarlamalar men reformalardyń dáiektiligin jáne ózara sabaqtastyǵyn qamtamasyz etýge tiis ekenin atap ótti.
– Memlekettik josparlaýdyń jańa júiesi dogmatizm men kózboiaýshylyqtan tolyq ada bolýy qajet. Sulý sóz qanshalyqty az bolsa, mazmuny sonshalyq bai bolady. Ol atqarýshylarǵa is-qimyl erkindigin berý úshin óte pragmatikalyq bolýy tiis. Atqarýshylarǵa qosymsha jumys júktemeý asa mańyzdy. Iaǵni, basqa naqty isterge nuqsan keltirmeý úshin bul baǵyttaǵy jumystarǵa kúsh túsirmeý kerek. Úkimet sarapshylardyń qoǵamdastyǵymen jáne jurtshylyqpen tyǵyz yqpaldastyqta jumys isteýi tiis, – dedi Memleket basshysy.
Prezident memlekettik josparlaý reformasy júiesinde tsifrlandyrýdy jedeldetý máselesine basa mán berýdi tapsyrdy. Sonymen qatar memlekettik organdar júzege asyryp jatqan qujattar men baǵdarlamalardyń barlyq satysyna taldaý jasaý qajet.
– Táýelsizdik jyldarynda kóptegen baǵdarlama jasaldy. Onyń birazy kúshin joidy, jańa baǵdarlamalar men qujattar paida bolýda. Olardyń bárin satyly túrde júielep, qajet emesterinen arylý kerek. Josparlaýdyń atqarýshylarǵa jáne halyqqa meilinshe túsinikti ári ashyq júiesin jasaǵan jón.
Memleket basshysy konsýltativtik komitetter jumysynyń mańyzdylyǵyna nazar aýdaryp, birinshi kezektegi reformalardyń tizimin anyqtaýǵa jáne olardy júzege asyrý jónindegi usynystarǵa bailanysty naqty mindet júktedi. Sondai-aq Prezident Áleýmettik kodeks, «Tsifrlyq Qazaqstan», «AÓK-2025» siiaqty iri reformalardyń ázirlenýine erekshe nazar aýdarýdy tapsyrdy. Barlyq taraptar úshin ashyq ári biryńǵai tártip ornatýdyń máni zor. Ádil básekelestik qalyptastyrý, ákimshilik qysymdardy boldyrmaý – ekonomikalyq ósimniń júieli sharty.
Prezident sot jáne quqyq qorǵaý júielerin reformalaý máselesine de nazar aýdardy. Onyń pikirinshe, sot jáne quqyq qorǵaý qyzmetine ozyq IT-tehnologiiany engizý jáne tsifrlandyrý jumystaryn jalǵastyrý kerek. Sýdialar korpýsy men quqyq qorǵaý organdaryndaǵy jeke quramnyń kásibi biliktiligin arttyrýǵa basa mán berý qajet.
– Bizge júieli, sonyń ishinde, kadrlyq sipattaǵy sharalar qabyldaý kerek. Joǵarǵy Sottyń sýdiasy nemese oblystyq sottardyń tóraǵasy bolsyn sýdia laýazymyna taǵaiyndaǵan kezde, eń aldymen, sýdialar korpýsynyń ózinde úlken másele týyndaidy. Olar bir-birin kásibi biliksiz, jeke jáne basqa da bailanystaryn paidalanady dep kinálaidy. Osy tiimsiz tendentsiialardy birjola joiý qajet, – dedi Memleket basshysy.
Qasym-Jomart Toqaev óz sózinde reformalar júrgizý barysynda barlyq zańnamalyq ózgerister muqiiat ári egjei-tegjeili pysyqtalýy kerek ekenin aitty.
– Bul jerde mynadai máselelerdi túsiný mańyzdy: Qylmystyq jáne qylmystyq-protsessýaldyq zańnamanyń jii ózgerýi quqyq qoldaný tájiribesiniń turaqtylyǵyna nuqsan keltiredi. Qatelesý qaýpin arttyrady. Bul azamattarymyzdyń taǵdyryna áser etýi múmkin. Sondyqtan bul baǵyttaǵy qadamymyz durys. Kelesi jyly osy saladaǵy reformalar jaqsy qarqyn alyp, naqty nátijeler kórsetýi tiis, – dedi Memleket basshysy.
Qasym-Jomart Toqaev Joǵary memlekettik basqarýdyń barlyq júiesi Qazaqstan halqyna adal, shynaiy qyzmet etýi kerek ekenin aitty. Memlekettik basqarýdyń barlyq júiesin – memlekettik qyzmetten jergilikti ózin-ózi basqarý deńgeiine deiin is júzinde qaita qurý qajet.
Jiyn qorytyndysy boiynsha QR Prezidenti janyndaǵy Reformalar jónindegi joǵary keńestiń 2021 jylǵa arnalǵan jumys jospary jáne konsýltativtik komitetterdiń quramy bekitildi.
