Tanymal ánshi Roza Álqoja áleýmettik jelidegi paraqshasynda kópshilikke keńinen tanys «Saǵyndym seni» ániniń taǵdyryna toqtalyp, týyndynyń jańa oryndaýda qalai ózgergenin aityp berdi, dep habarlaidy ult.kz.
Óner iesiniń aitýynsha, ár ánniń ózindik tarihy men taǵdyry bar. Ýaqyt óte kele týyndy túrli oryndaýshylardyń daýysymen jańasha sipat alyp, tyńdarman júregine árqalai jol tabady. Roza Álqoja "Saǵyndym seni" ániniń alǵashynda bala júregindegi saǵynyshtan týǵanyn jetkizdi. Keiin bul týyndyǵa Ajardyń Orazalyny joqtaǵan muńy men ókinishi qosylyp, ánniń mazmuny burynǵydan da tereńdei túsken.
"Bul ándi qazaq-qyrǵyz, kabardina-balqar eli oryndaidy. Túrik dúniesi tamsanǵan án áý basta bala júrektiń saǵynyshy edi. Taza sezimniń tumasy bolǵandyqtan da talailardy terbedi. Oǵan Ajardyń ashy zary men ókinishi qosylǵanda bar átteńniń áidik notasyn basty. Bul sor men baqtan turatyn tirlik-tepkiniń shyndyǵy edi", – dep jazdy ánshi.
Sondai-aq óner iesi ánniń taǵy bir jańa nusqasynyń dúniege kelýine ózi sebepker bolǵanyn aitty. Onyń sózinshe, Maira apaiy Serikbolmen birge án oryndaýdy usynǵanda, ol kóp oilanbastan "Saǵyndym seni" týyndysyn tańdaǵan.
"Endi Maira apamyz Serikbolmen án ait degende osy ándi usyndym. "Saǵyndyrǵan ánder-aida" eldiń saǵynyp tyńdaityn ánin nege oryndamasqa?! Serik inimniń zor daýysymen án basqa bir keńistikke alyp ketkendei!" – dep áserimen bólisti Roza Álqoja.
Ánshi bir týyndynyń ártúrli oryndaýda shyrqalýyn quptaitynyn da jasyrmady. Onyń pikirinshe, ánniń jańasha oryndalýy bastapqy qunyn joǵaltpaidy, kerisinshe, oǵan ózgeshe reńk berip, tyńdarmanǵa basqa qyrynan tanytady.
Osylaisha Roza Álqoja "Saǵyndym seni" ániniń ýaqyt ótken saiyn jańa mazmunǵa ie bolyp, birneshe halyqtyń júreginen oryn tapqanyn atap ótti.
Roza Álqoja kim?
Roza Álqoja – qazaq estradasynyń tanymal ánshisi, aqyn ári kompozitor. Ol 1981 jyly 1 qazanda dúniege kelgen.
Bala kezinen án men jyrǵa qyzyǵyp, dombyra úiirmesine qatysqan. Mektep qabyrǵasynda júrip túrli óner baiqaýlaryna qatysyp, "Ánshi balapan" baiqaýynda bas júlde ielengen. Mektepti úzdik aiaqtaǵannan keiin ál-Farabi atyndaǵy Qazaq ulttyq ýniversitetiniń jýrnalistika fakýltetine oqýǵa túsken. Joǵary oqý ornyn támamdaǵan soń "Aq jol – Qazaqstan" gazetiniń óner bóliminde eńbek etken. Keiin jýrnalistikadan ánshilikke bet buryp, shyǵarmashylyq jolyn jalǵastyrǵan.
2008 jyly "Men syiǵa tartqan oramal" atty alǵashqy án jinaǵy jaryq kórdi. Onyń "Jylatqanyń netkeniń", "Qara kúz", "Júrek nazy", "Án salshy, Roza", "Myna ómir ǵajap qandai" ánderi kópshilikke keńinen tanyldy.
Roza Álqoja óz repertýaryndaǵy shyǵarmalarmen qatar basqa ónerpazdarǵa da án jazǵan. Atap aitqanda, Ajar Túzelbekqyzy oryndaǵan "Saǵyndym seni", "Baqyttymyn", Erkin Nurjanov shyrqaǵan "Qańtarda jaýǵan jańbyr" týyndylarynyń avtory. Ánshi shyǵarmashylyǵynda ulttyq naqysh pen qazaqy áýenge erekshe mán beredi. Ol birneshe jeke shyǵarmashylyq kesh ótkizip, tyńdarmanymen júzdesken. Sondai-aq óner iesi Muqaǵali Maqataev atyndaǵy medalmen marapattalǵan. Roza Álqoja jýrnalist Aidyn Qabamen otbasyn qurǵan, bes balanyń anasy.
