Memleket basshysy Qasym-Jomart Toqaev Májilis tóraǵasy Erlan Qoshanovty qabyldady, - dep habarlaidy "Ult aqparat" Aqordaǵa silteme jasap.
Prezidentke Parlament Májilisiniń qazirgi zań shyǵarý qyzmeti týraly aqparat berildi. Atap aitqanda, Májilis depýtattary "Adam quqyqtary jónindegi ýákil týraly", "Konstitýtsiialyq sot týraly", "Prokýratýra týraly" zań jobalaryn, sondai-aq birqatar konstitýtsiialyq jáne basqa da zańdarǵa engiziletin ózgeristerdi qarastyryp, Senatqa joldady. Atalǵan qujattardy talqylaýǵa sarapshylar toby qatysty jáne qoǵam men BAQ úshin jariia túrde ótti.
Palata maquldaǵan zań jobalary biylǵy 5 maýsymda ótken referendýmda halyq daýys bergen konstitýtsiialyq reformalardyń negizgi erejelerin júzege asyrýǵa baǵyttalǵan. Engiziletin zań normalary azamattardyń konstitýtsiialyq quqyqtarynyń qorǵalýyn kúsheitýge jáne turǵyndardyń elimizdiń saiasi ómirine aralasý múmkindigin keńeitýge septigin tigizedi.
Erlan Qoshanov Qasym-Jomart Toqaevqa parlamenttik diplomatiia jáne shet memleketterdiń zań shyǵarýshy organdarymen aradaǵy is-áreketter aiasyndaǵy jumystardyń negizgi basymdyqtary týraly aitty.
Májilis tóraǵasy Memleket basshysyna Túrkiianyń Iznik qalasynda ótken IV Dúniejúzilik kóshpendiler oiyndarynyń saltanatty ashylý rásimine elimizdiń delegatsiiasynyń qatysqany jóninde baiandady. Túrki qoǵamdastyǵy V Dúniejúzilik kóshpendiler oiyndaryn 2024 jyly Qazaqstanda ótkizý jónindegi usynysty biraýyzdan qoldady.
