Prezident Qasym-Jomart Toqaev Samarqand qalasynda ótetin Túrki memleketteri uiymynyń Sammiti aiasynda Majarstan Premer-ministri Viktor Orbanmen kezdesti, dep habarlaidy "Ult aqparat" Aqordanyń baspasóz qyzmeti silteme jasap.
Memleket basshysy Qazaqstan men Majarstan arasyndaǵy qarym-qatynasty, onyń ishinde ekonomikalyq yntymaqtastyqty odan ári nyǵaitýǵa nietti ekenin bildirdi.
"Bizdiń elder arasyndaǵy bailanys jaqsy damyp kele jatyr. Áitse de biz eki memlekettiń yntymaqtastyǵyna tyń serpin berýimiz kerek dep oilaimyn. Ásirese, aradaǵy saýda ainalymynyń kólemi áli de qanaǵattanarlyq deńgeide emes. Bul baǵytta eki eldiń de áleýeti zor. Majarstan – Qazaqstan úshin mańyzdy seriktes el. Siz Premer-ministr retinde bizdiń túrli saladaǵy yntymaqtastyǵymyzdy ilgeriletýge kóp eńbek sińirip kele jatqanyńyzdy bilemin", – dedi Toqaev.
Óz kezeginde Majarstan Premer-ministri Viktor Orban ekijaqty kezdesýdi uiymdastyrǵany úshin Qazaqstan tarapyna alǵys aitty.
– Qazaqstan men Majarstan arasyndaǵy qarym-qatynastyń orny erekshe. Men osydan birneshe jyl buryn alǵash ret Premer-ministr qyzmetin atqarǵanda Qazaqstan men Majarstannyń mádeni, ekonomikalyq bailanystary óte berik bolǵanyn bilemin. Endi eki eldiń yntymaqtastyǵyna biznes ókilderi tyń serpin berýi kerek. Qazaqstannyń iri kompaniialary Majarstanǵa investitsiia quisa, ekonomikalyq qarym-qatynasymyz jańa deńgeige kóteriler edi, – dedi Majarstan Premer-ministri.
Kezdesýde Qazaqstan men Majarstan arasyndaǵy mádeni-gýmanitarlyq bailanystar, sondai-aq halyqaralyq jáne aimaqtyq kún tártibindegi máseleler talqylandy.
