Memleket basshysy Qasym-Jomart Toqaev Premer-Ministr Asqar Mamindi qabyldady, dep habarlaidy Aqorda.
Qazaqstan Prezidentine biylǵy 9 ai ishindegi elimizdiń áleýmettik-ekonomikalyq damý qorytyndylary jóninde esep berildi.
Qasym-Jomart Toqaevqa birqatar salada damýdyń oń qarqyny baiqalatyny baiandaldy. Atap aitqanda óńdeý ónerkásibiniń ósimi 3,3 %-ǵa jetken, qurylys kólemi 10,5 %-ǵa, turǵyn úilerdiń paidalanýǵa berilýi 9 %-ǵa nemese shamamen 9,6 million sharshy metrge artqan. Aýyl sharýashylyǵyndaǵy ósim kórsetkishi 5%-dy qurady. Qazaqstannyń altyn-valiýta qory men Ulttyq qor aktivteri 1 qazandaǵy málimet boiynsha 91,1 milliard dollarǵa jetti.
Úkimet basshysynyń aitýynsha, qyrkúiekte qyzmet kórsetý salasyndaǵy belsendilikti qaita qalpyna keltirý jumystary bastaldy. Osy rette tamyz aiymen salystyrǵanda saýda-sattyq 2,7 %-ǵa, bailanys 1,3%-ǵa, kólik jáne qoima 1,2 %-ǵa artqan. Qyzmet kórsetý sektoryndaǵy ósim shaǵyn jáne orta biznestiń jandanǵanyn bildiredi. Bul jańa jumys oryndarynyń ashylýyna jáne azamattardyń ál-aýqatynyń jaqsarýyna yqpal etedi.
Premer-Ministr 11-12 qazan kúnderi Abý-Dabi qalasyna jasaǵan jumys saparynyń qorytyndylary týraly esep berdi. Atalǵan sapar barysynda Memleket basshysy Qasym-Jomart Toqaevtyń biylǵy qańtarda Birikken Arab Ámirlikterine jasaǵan resmi sapary kezinde qol jetkizgen ýaǵdalastyqtardyń naqty júzege asyrylyp jatqanyna kóz jetkizildi. Sonymen qatar eki el úkimetteri Investitsiialyq yntymaqtastyq týraly memorandýmǵa qol qoidy. Onda quny 6,1 milliard dollar bolatyn 21 jobany júzege asyrý kózdelgen. Atalǵan qujat joǵary qosymsha quny bar jáne paidasy mol, sondai-aq, ishki naryqta da, syrtqy naryqta da úlken suranysqa ie bolatyn óndiris oryndaryn ashýǵa baǵyttalǵan.
Memleket basshysy ekonomikany damytýdyń oń qarqynyn qamtamasyz etý jónindegi Úkimettiń atqarǵan is-qimyldaryn atap ótip, azamattarymyzdyń densaýlyǵyna, shaǵyn jáne orta biznestiń jumysyna, sondai-aq, jalpy ekonomikanyń damýyna shetelde keń taraǵan koronavirýs indetiniń keri áserin boldyrmaý úshin Premer-Ministrge elimizdegi epidemiologiialyq ahýaldy qatań baqylaýǵa alýdy tapsyrdy.
