Qazaqstan Prezidenti Qyrǵyz Respýblikasynyń Syrtqy ister ministri Rýslan Qazaqbaevty qabyldady, dep habarlaidy Aqorda.
Qasym-Jomart Toqaev Qazaqstanǵa jumys saparymen kelgen Qyrǵyz Respýblikasynyń Syrtqy ister ministri Rýslan Qazaqbaevty qabyldady.
Memleket basshysy eki el arasyndaǵy ózara is-qimyldardyń deńgeiin joǵary baǵalady.
– Qazaqstan men Qyrǵyzstan eń jaqyn memleketter. Bizdi bólip turǵan eshteńe joq, kerisinshe elderimizdi biriktirýshi faktorlar óte kóp. Qazaqstan úshin Qyrǵyzstan – senimdi odaqtas, mańyzdy strategiialyq seriktes jáne baýyrlas el, – dedi Qasym-Jomart Toqaev.
Prezident Qyrǵyzstanda bolyp jatqan oqiǵalardy Qazaqstannyń muqiiat baqylap otyrǵanyn, ony qyrǵyz eliniń ishki máselesi dep qaraitynyn atap ótti.
– Baýyrlas qyrǵyz eliniń bolashaǵyna alańdaimyz. Sondyqtan Qyrǵyzstanǵa kómek kórsetý úshin barlyq múmkindikterdi qarastyramyz. Buǵan deiingi kelisimder negizinde eki el arasyndaǵy qarym-qatynastardy damytýdy jalǵastyra beremiz, – dedi Memleket basshysy.
Rýslan Qazaqbaev óz kezeginde Qasym-Jomart Toqaevqa qabyldaǵany jáne Qyrǵyzstandaǵy kúrdeli kezeńde qoldaý bildirgeni, koronavirýs pandemiiasy kezinde gýmanitarlyq kómek kórsetkeni úshin alǵys aitty.
– Meniń saparymnyń basty maqsaty – elimizde bolyp jatqan ishki saiasi ózgeristerge qaramastan baýyrlas qazaq eline qatysty syrtqy saiasi baǵdarymyzdyń ózgermeitinin aiqyndaý. Qyrǵyz Respýblikasy baýyrlas qazaq elimen aradaǵy jaqsy qarym-qatynastardy qashan da qurmet tutady jáne solai qala beredi. Elimizdiń jańa basshylyǵy baýyrlas eki eldiń túpki múddelerine sai keletin barlyq baǵyttar boiynsha qyrǵyz-qazaq qatynastaryn odan ári nyǵaityp, arttyrýǵa nietti, – dedi Qyrǵystannyń Syrtqy ister ministri.
Prezident ministrmen kezdesý barysynda saiasi, saýda-ekonomikalyq, investitsiialyq, kólik-tranzittik jáne sý-energetika salalaryndaǵy yntymaqtastyqty nyǵaitý máselelerine erekshe kóńil bóldi.
