Memleket basshysy Biologiialyq qaýipsizdik problemalary ǵylymi-zertteý institýtynyń bas direktory Kúnsulý Zakariany qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa koronavirýsqa qarsy otandyq vaktsinanyń ázirlený barysy týraly aqparat berildi.
Kúnsulý Zakarianyń málimetine sáikes búgingi tańda institýttyń bazasyndaǵy bes platformada koronavirýsqa qarsy vaktsinalar daiyndalýda. Institýt ázirlegen belsendi emes vaktsina Dúniejúzilik densaýlyq saqtaý uiymynda maquldanyp, klinikalyq zertteýlerdiń birinshi kezeńinen ótti jáne qazirgi ýaqytta Ulttyq ǵylymi ftiziopýlmonologiia ortalyǵynda zertteýdiń ekinshi kezeńi júrgizilip jatyr.
Koronavirýs indetine qarsy ázirlenip jatqan otandyq ekinshi sýbbirlikti vaktsina DDSU tarapynan maquldanyp, klinikalyq zertteýlerden sátti ótken. Bul vaktsinanyń materialdary Dárilik zattar men meditsinalyq buiymdardy saraptaý ulttyq ortalyǵynda qaralyp jatyr.
Prezidentke Qazaqstanda buryn-sońdy bolmaǵan immýndyq preparattar shyǵaratyn zaýyt qurylysy týraly da málimet berildi. Ǵylymi-zertteý institýtynda otandyq vaktsinalar shyǵaratyn zaýyt qurylysy júrgizilýde. Zaýyttyń jobalyq qýaty jylyna 60 million mólsherde vaktsina shyǵarýǵa jetedi. Osy arqyly otandyq naryqty ǵana qamtyp qoimai, ony eksporttaýǵa da múmkindik týady. Atalǵan zaýyt iske qosylǵan kezde elimiz importtyq táýeldilikten arylady.
Memleket basshysy ǵylymi-zertteý institýtynyń qyzmetkerlerine arnalǵan turǵyn úi qurylysynyń qarqynyn arttyrý usynysyn qoldady. Sonymen qatar kezdesýde qyzmetkerlerdiń jalaqysyn kóterý, atalǵan salaǵa jas mamandardy kóptep tartý, normativtik-quqyqtyq aktilerge vaktsinany ýaqytsha tirkeý túsinigin engizý máseleleri qozǵaldy.
Kezdesý sońynda Qasym-Jomart Toqaev otandyq vaktsinalardy daiyndaý isine qatysty birqatar naqty tapsyrma berdi.
