foto: Aqorda
Memleket basshysy Qasym-Jomart Toqaev Qazaqstan halqyn Jańa 2025 jylmen quttyqtady, dep habarlaidy Ult.kz Aqordanyń resmi saityna silteme jasap.
Aqordanyń baspasóz qyzmeti prezidenttiń jańajyldyq quttyqtaý sóziniń tolyq mátinin jariialady.
Qymbatty otandastar!
Sizderdi Jańa jyl merekesimen shyn júrekten quttyqtaimyn!
Búgin bárimiz júzjyldyqtyń shirek ǵasyrlyq belesine qadam basqaly turmyz. Biyl Altai men Atyraý arasyndaǵy barsha jurt tarihtyń jańa paraǵyn bir mezette ashady. Halqymyz eki jyldyń toǵysar tusyn izgi nietpen, erekshe kóńil-kúimen kútedi. Ótken kúnderdi saralap, eski jylǵa baǵa beredi. Arman-maqsatyn aiqyndap, bolashaqqa úlken úmitpen qaraidy. Bul – naǵyz otbasylyq mereke. Sondyqtan men barshańyzǵa, eń aldymen, elimiz aman, jurtymyz tynysh, baýyrymyz bútin bolsyn degim keledi.Ulý jyly ultymyz úshin mańyzdy oqiǵalarǵa toly boldy. Túrli saladaǵy reformalar jemisin bere bastady. Ekonomikanyń jańa baǵdaryn belgilep, naqty sharalardy qolǵa aldyq. Óńdeý ónerkásibi qarqyndy damýda. Birqatar iri óndiris orny ashyldy. Investitsiialyq ahýal jaqsardy. Myńdaǵan shaqyrym jol salynyp, jóndeldi. Elimizdegi eń uzyn kópirdiń qurylysy aiaqtalyp, halyq igiligine berildi.
Diqandarymyz mol astyq jinap, qambany dánge toltyrdy. "Taza Qazaqstan" aktsiiasynyń aiasynda qalalar men aýyldar jańasha kelbetke ie bola bastady. Alǵash ret azamattarymyzdyń ortasha ómir súrý uzaqtyǵy 75 jasqa jetti.
Óskeleń urpaqtyń jarqyn bolashaǵy úshin aýqymdy jumys atqarylyp jatyr. Ulttyq qordaǵy qarjynyń bir bóligi balalardyń esepshotyna tústi. Júzden astam jańa mektep ashyldy. Kóptegen áleýmettik nysan salyndy.
Parlament depýtattary qoǵamdaǵy ózekti máseleler boiynsha zańdar qabyldady. Sondai-aq biyl biz elimizdiń keleshegine airyqsha áser etetin óte mańyzdy sheshim qabyldadyq. Atom elektr stantsiiasyna qatysty referendým ótkizdik. Kópshilik bul bastamaǵa qoldaý bildirdi.
Qazaqstannyń álemdik arenadaǵy abyroiy arta tústi. Astanada bedeldi halyqaralyq uiymdardyń mańyzdy sammitteri ótti.Dúniejúzilik kóshpendiler oiyndaryna myńdaǵan sportshylar men meimandar keldi. Bairaqty básekeni tabysty uiymdastyryp, tól órkenietimizdi jer júzine tanyttyq. Sportshylarymyz Olimpiada jáne Paralimpiada oiyndarynda kók týymyzdy biikte jelbiretti.
Oqýshylarymyz túrli bilim saiystarynan júldeli oraldy. Basqa da kóptegen tabys bar.
Biyl kóktemde birqatar aimaqta alapat tasqyn bolǵanyn bilesizder. Tabiǵattyń tosyn synaǵy bárimizge aýyr tigeni sózsiz. Soǵan qaramastan, qiyn kúnderde halqymyz bir-birine janashyr bolyp, myzǵymas birligin kórsetti. Zardap shekken barsha azamatqa jan-jaqty kómek berildi. Memleket eshkimdi nazardan tys qaldyrǵan joq. Barlyq mindettemesin tolyq oryndady. Júzdegen otbasy Jańa jyldy jańa shańyraqta qarsy alyp jatyr.Biz osylaisha yrysty yntymaǵymyzdyń arqasynda barlyq qiyndyqty eńseremiz. Alǵa senimmen qadam basamyz. Júieli reformalar odan ári jalǵasady. Josparymyzdyń bári oidaǵydai oryndalady. Aldaǵy jyl budan da tabysty bolady. Men Prezident retinde buǵan bar kúsh-jigerimdi salamyn.
Úkimet tiimdi jumys atqaryp, ekonomikanyń qarqyndy ósimin qamtamasyz etýge tiis. Jańa óndiris oryndaryn ashyp, bizneske qolaily jaǵdai jasaý qajet. Jol salýdy jalǵastyryp, kommýnaldyq saladaǵy túitkildi máselelerdi sheshý kerek. Tsifrlyq tehnologiialardy, sonyń ishinde jasandy intellektini qoldaný aiasyn keńeitken jón. Aýyl eńbekkerlerin barynsha qoldaý mańyzdy. Basty maqsatymyz – azamattardyń ál-aýqatyn arttyrý.
Qadirli aǵaiyn!
Osy merekelik sátte men ár shańyraqqa shattyq tileimin! Jańa jyl ár azamatqa jaqsylyq ákelsin! Tórt qubylamyz túgel bolsyn! Ardaqty analarymyz ben ardagerlerimiz aman bolsyn! Jas urpaqtyń joly ashyq, bolashaǵy jarqyn bolsyn! Qasterli Otanymyz ósip-órkendei bersin! Jańa jylda barshańyzǵa amandyq, baq-bereke tileimin!
Ár úide qýanysh kóp bolsyn! Sizderge myqty densaýlyq tileimin! Yrys-nesibelerińiz arta bersin!
Jańa jyl qutty bolsyn!
