Memleket basshysy Qasym-Jomart Toqaev Qazaqstanǵa memlekettik saparmen kelgen Qatar Ámiri sheih Támim ben Hamad Ál Tánimen shaǵyn quramda kelissóz júrgizdi, dep habarlaidy "Ult aqparat" Aqordaǵa silteme jasap.
Kezdesý aldynda «Aqorda» rezidentsiiasynda Qatar Ámirin saltanatty qarsy alý sharasy ótti. Qurmet Qaraýylynyń bastyǵy eki el basshysyna raport berip, Qazaqstan men Qatardyń memlekettik ánurandary oryndalǵannan keiin memleketter basshylary ekijaqty kezdesý ótetin zalǵa bardy.
Prezident Qatar Ámiri Támim ben Hamad Ál Tánige shaqyrýyn qabyl alyp, Qazaqstanǵa memlekettik saparmen kelgeni úshin alǵys aitty.
– Joǵary mártebeli sheih Támim myrza, ózińizben Qazaqstanda kezdesip otyrǵanyma óte qýanyshtymyn. Meniń shaqyrýymdy qabyl alyp, memlekettik saparmen Qazaqstanǵa kelgenińiz úshin shyn júrekten rizashylyǵymdy bildirgim keledi. Biz búgin ekijaqty qarym-qatynastyń eń mańyzdy máseleleri boiynsha tiisti ýaǵdalastyqtarǵa qol jetkizemiz. Biz úshin Qatar Memleketi – Taiaý Shyǵystaǵy eń mańyzdy seriktes. Sondyqtan qarym-qatynasymyzdy odan ári damytý úshin bar kúsh-jigerimizdi salamyz, – dedi Memleket basshysy.
Qatar Ámiri Prezident Qasym-Jomart Toqaevqa Qazaqstanǵa shaqyrǵany úshin alǵys aityp, qonaqjailyq kórsetkeni úshin rizashylyǵyn bildirdi.
– Joǵary mártebeli prezident myrza, elińizge memlekettik saparmen shaqyrǵanyńyz úshin alǵys aitamyn. Eki el arasynda jaqsy qarym-qatynas ornaǵan. Keiingi jyldary ártúrli saladaǵy bailanystarymyz qarqyndy damyp keledi. Búgingi memlekettik sapar aiasynda maýsym aiynda Dohada ótken ekonomikalyq forým kezindegi birqatar ýaǵdalastyqtardy búgin talqylaimyz. Bul kelisimderdiń maqsaty – birneshe salada yntymaqtastyqty damytý. Búgin biz keńeitilgen quramda ministerlerdiń qatysýymen osy máselelerdi jan-jaqty qarastyramyz. Sondai-aq erteń ótetin Aziiadaǵy ózara is-qimyl jáne senim sharalary jónindegi keńes sammitiniń sátti ótýine tilektestik bildiremin, – dedi Qatar Ámiri.
