Memleket basshysy «Altyn sapa» konkýrsynyń jeńimpazdaryn marapattaý rásimine qatysty, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev óz sózinde Táýelsizdik jyldarynda memlekettiń qoldaýymen otandyq biznestiń jańa legi qalyptasqanyn jáne olar ulttyq ekonomikanyń basty qozǵaýshy kúshine ainalǵanyn atap ótti.
– Indýstriialandyrý kezeńinde elimizde 1300-den astam jańa óndiris iske qosyldy. Nátijesinde buryn óndirilmegen kóptegen taýarlar shyǵaryla bastady. Sondai-aq 200 myń jumys orny ashyldy. Azamattarymyz zaman talabyna sai jańa kásipterdi igerýde. Osynyń bári halqymyzdyń ál-aýqatyn jáne básekelik qabiletin arttyrýǵa múmkindik beredi. Bizdiń maqsatymyz – Qazaqstandy qýatty memleketke ainaldyrý, – dedi Prezident.
Memleket basshysynyń aitýynsha, pandemiia men álemdik ekonomikalyq daǵdarysqa qaramastan, 11 aidyń qorytyndysy boiynsha óńdeý ónerkásibindegi ósim qarqyny 3,3% deńgeiinde saqtalyp otyr. Biyl Indýstriialandyrý kartasy aiasynda 20 myń jańa jumys ornymen qamtamasyz etetin 200-den astam óndiris iske qosyldy. Sońǵy bes jylda ekonomikadaǵy shaǵyn jáne orta biznestiń úlesi 24-ten 32 paiyzǵa artty. Kásipkerlik saladaǵy jumyspen qamtý kólemi 21 paiyzǵa, iaǵni 2,8-den 3,4 million adamǵa kóbeidi. Bul Úkimet pen «Atameken» Ulttyq kásipkerler palatasynyń qolaily biznes-ahýal qalyptastyrý, qarjylai jáne basqa da qoldaý sharalaryn usyný jónindegi dáiekti jumystarynyń nátijesinde múmkin boldy. Biyl bizneske memlekettik qyzmet kórsetý merzimin qysqartý, rásimderdi qaita retteý jáne odan ári jeńildetý máselelerin qamtityn zańnamalyq bastamalardyń segizinshi toptamasy qabyldandy.
– Biylǵy 1 qańtardan bastap meniń Jarlyǵymmen shaǵyn jáne mikro kásipkerlik sýbektilerin tekserýge aldaǵy úsh jylǵa moratorii engizildi. Meniń tapsyrmam boiynsha Úkimet pen Ulttyq palata retteý saiasatynyń jańa ádisterin ázirleýge kirisip ketti. Kelesi jyldan bastap qazirgi talaptardy qaita qaraý jáne «jańadan retteý» qaǵidatyn engizý jónindegi zańnamalyq normalar birtindep qabyldanatyn bolady. Bul biznesti «aqyldy retteýdiń» túbegeili jańa júiesin qalyptastyra otyryp, mańyzdy emes erejeler men qaitalanatyn talaptardy alyp tastaýǵa múmkindik beredi, – dedi Qasym-Jomart Toqaev.
Prezident ekonomikany memleket menshiginen odan ári alý isi naqty básekelestikti damytýda jáne ár kásipkerge shyn máninde teń múmkindik berýde mańyzdy ról atqaratynyn aitty.
– Biz memlekettiń ekonomikaǵa aralasý úlesin aitarlyqtai azaitý úshin birtindep jaǵdai jasaimyz. Biyl kvazimemlekettik sektor sýbektilerin qurýǵa jariialanǵan moratorii aiaqtalady. Bul baǵyttaǵy maqsatqa áli tolyq qol jetkizilgen joq dep sanaimyn. Sondyqtan meniń Jarlyǵymmen atalǵan moratorii kelesi jyldyń aiaǵyna deiin sozylady. Memleket ońtaily biznes orta qalyptastyrýdan bólek, elimizdegi kásipkerlikti jan-jaqty damytý úshin júieli sharalar qabyldamaq, – dedi Memleket basshysy.
Pandemiia kezinde biznes nesielerdi qaitarý merzimin shegerýge múmkindik aldy, salyqtan bosatyldy jáne basqa da jeńildikter men artyqshylyqtarǵa ie boldy. Kórsetilgen qoldaýdyń jalpy kólemi 1,5 trillion teńgeden asty.
Qasym-Jomart Toqaev Qazaqstannyń DSU men Eýraziialyq ekonomikalyq odaqqa múshe bolýy, internet saýdasynyń damýy jańa múmkindikter men taýar ótkizý naryqtaryna jol ashady. Biraq sonymen birge sheteldik ónim óndirýshiler tarapynan bolatyn básekelestikti kúsheitedi. Mundai jaǵdaida Qazaqstan biznesi ónim sapasy men eńbek ónimdiligin únemi jaqsartyp, jańa ári ozyq tehnologiialar men biznes-praktikany meńgerýi qajet.
– Ýaqyt bir ornynda turmaidy. Álem, ekonomika, tehnologiialyq qurylymdar jyldam ózgerýde. Konkýrstyń talaptary jańartylyp, kásipkerlerimizdi óz jumystaryn únemi jetildirip otyrýǵa yntalandyrýy kerek. Bul jahandyq «tsifrlyq álem» jáne Tórtinshi ónerkásiptik revoliýtsiianyń tehnologiialaryn qarqyndy engizý jaǵdaiynda asa mańyzdy. Úkimet pen Ulttyq palata jeńimpaz kásiporyndarǵa qosymsha qoldaý kórsetý tetikteri týraly oilanýy kerek. Bul biznesti Konkýrsqa kóp qatysý úshin yntalandyrady jáne elimizdegi sapa menedjmentiniń tujyrymdamasyn ilgeriletýge yqpal etedi, – dedi Prezident.
Sonymen qatar Memleket basshysy konkýrs jeńimpazdarynyń osyndai sheteldik konkýrstarǵa qatysýyn qamtamasyz etýge jáne olarǵa qoldaý kórsetýge shaqyrdy. Osy rette, 2019 jyly «Altyn sapa» syilyǵynyń bes jeńimpazy ónim jáne qyzmet kórsetý sapasy salasyndaǵy jetistikteri úshin TMD syilyǵynyń iegerleri jáne diplomanttary atandy. Mundai keshendi qoldaý otandyq kásiporyndar úshin ózderiniń básekege qabilettilikterin arttyrýǵa, ónim eksportyn ulǵaitýǵa jáne ekonomikada jańa jumys oryndaryn ashýǵa múmkindik beredi.
Qasym-Jomart Toqaev sóziniń sońynda «Altyn sapa» konkýrsyna qatysqan barlyq biznes ókilderine alǵys bildirdi.
Biyl «Úzdik indýstriialyq joba» nominatsiiasy boiynsha Almaty qalasyndaǵy «KELET» aktsionerlik qoǵamy jeńimpaz atandy. Al, «Úzdik innovatsiialyq joba» júldesine «KSP steel» jaýapkershiligi shekteýli seriktestiginiń Pavlodar filialy ie boldy. Jeńimpazdardyń syilyqtaryn Prezidenttiń atynan Premer-Ministr Asqar Mamin tapsyrdy.
Sonymen qatar «Óndiristik baǵyttaǵy úzdik kásiporyn» nominatsiiasy boiynsha «Almaty kópir qurylysy zaýyty» JShS (Almaty q.), «MAKS jolqurylysservis – 21» JShS (Almaty oblysy), «Stadbolt Manýfaktýring» JShS (Atyraý oblysy); «Halyq úshin taýar óndiretin úzdik kásiporyn» nominatsiiasy boiynsha «GrandMiks» JK (Túrkistan oblysy), «Global-Arnaiy kiim» Óndiristik birlestigi» JShS (Aqtóbe oblysy), «Dana-Del» JK (Jambyl oblysy); «Qyzmet kórsetetin úzdik kásiporyn» nominatsiiasy boiynsha «Turan» ýniversiteti (Almaty qalasy), «SKF «Otdelstroi» JShS (Batys Qazaqstan oblysy), «Elit-NS ortalyǵy» JShS (Nur-Sultan qalasy); «Azyq-túlik taýarlaryn jáne/nemese aýyl sharýashylyǵy ónimderin shyǵaratyn úzdik kásiporyn» nominatsiiasy boiynsha «Aqsai» Nan-bálish kombinaty» JShS (Almaty qalasy), «Nátije «Sút Fabrikasy» JShS (Qaraǵandy oblysy), «Paseka» sharýa qojalyǵy (Shyǵys Qazaqstan oblysy) «Altyn sapa» konkýrsynyń 2020 jylǵy iegerleri atandy.
