Sýret: Aqorda
Memleket basshysy Qasym-Jomart Toqaev buqaralyq aqparat quraldary qyzmetkerlerin merekesimen quttyqtady.
"Qurmetti jýrnalister!
Buqaralyq aqparat quraldarynyń qyzmetkerleri!
Sizderdi kásibi merekelerińizben quttyqtaimyn! Elimizdiń buqaralyq aqparat quraldary qoǵam sanasyn jańǵyrtyp, ult tutastyǵyn nyǵaitý jolynda airyqsha ról atqarady. Baspasóz salasyn damytý, sondai-aq jýrnalisterdiń quqyqtary men zańdy múddelerin qorǵaý – memlekettiń mańyzdy mindetiniń biri.
Qazaq jýrnalistikasynyń taǵylymdy tarihy, aǵa býyn qalyptastyrǵan erekshe qoltańbasy bar. Biz onyń bai shejiresi men aǵartýshylyq dástúrin barynsha saqtaýymyz qajet. Búgingi aqparat salasynyń ókilderi osy sabaqtastyqty laiyqty jalǵastyryp, ózine júktelgen jaýapty missiiany abyroimen atqaryp keledi.
Sizder qai kezde de halyqqa shynaiy ári jedel habar taratyp, kásibi biliktiliktiń ozyq úlgisin kórsetip júrsizder. Bolashaqta da eldik máselelerdi kóterip, ulttyq qundylyqtardy nasihattaýǵa belsene atsalysa beresizder dep senemin. Barshańyzǵa baq-bereke, tolaǵai tabys, shyǵarmashylyq shabyt tileimin!", - dep jazylǵan Prezident quttyqtaýynda.
