Qazaqstan musylmandary dini basqarmasy 2027 jylǵa arnalǵan dini kúnder kestesin bekitti. Kúntizbege sáikes, kelesi jyly Ramazan aiy 8 aqpanda bastalady, dep habarlaidy ult.kz.
Qasietti Qadir túni 5 naýryzdan 6 naýryzǵa qaraǵan túnge sáikes keledi. Al oraza aiaqtalǵannan keiingi Oraza ait merekesi 9 naýryzǵa belgilengen.
Qurban aittyń alǵashqy kúni 16 mamyrda bastalyp, mereke 18 mamyrǵa deiin jalǵasady. Onyń aldyndaǵy Arapa kúni 15 mamyrǵa sáikes keledi.
Kúntizbede ózge de mańyzdy dini kúnder kórsetilgen. Máselen, Miǵraj túni 4 qańtardan 5 qańtarǵa, Baraat túni 22 qańtardan 23 qańtarǵa qaraǵan túnge belgilengen. Musylman kúntizbesi boiynsha 1449 hijri jyl 6 maýsymda bastalady. Ashýra kúni — 15 maýsym, al Máýlit túni 14 tamyzdan 15 tamyzǵa qaraǵan túnge sáikes keledi.
Múftiiat hijri ailardyń bastalýy halyqaralyq astronomiialyq zertteý ortalyqtarynyń málimetteri negizinde eseptelgenin eskertti. Jańa aidyń kórinýine qarai dini kúnder kórsetilgen merzimnen bir kún erte nemese kesh bolýy múmkin.
Aita keteiik, Qazaqstan boiynsha Ait namazynyń kestesi jariialandy.
Oraza degen ne?
Oraza — tań atqannan kún batqanǵa deiin Alla razylyǵy úshin iship-jeýden jáne erli-zaiyptylardyń jaqyndasýynan tyiylý qulshylyǵy. Islamdaǵy bes paryzdyń biri sanalady.
Ramazan aiynda oraza ustaý baliǵat jasyna jetken, aqyl-esi durys, densaýlyǵy jaramdy musylmanǵa paryz. Orazanyń máni ash júrýmen shektelmeidi: ol adamdy sabyrly bolýǵa, nápsisin tejeýge, jaman sóz ben áreketten aýlaq júrýge jáne muqtaj jandarǵa kómektesýge tárbieleidi.
Tań aldynda ishiletin as sáresi, al kún batqan soń orazany ashý aýyzashar dep atalady.
Orazany ne buzady? Aýyz bekitken adam bilýi kerek erejeler
Oraza kezinde tań atqannan kún batqanǵa deiin ádeii tamaq jeý, sý ishý jáne jynystyq qatynasqa túsý orazany buzady. Temeki shegý de osy qatarǵa jatady. Sondyqtan aýyz bekitken adam sáresi men aýyzashar ýaqytyn muqiiat qadaǵalaýy kerek.
Umytyp iship-jese ne bolady?
Adam oraza ekenin umytyp, tamaq jep nemese sý iship qoisa, orazasy buzylmaidy. Alaida esine túsken boida iship-jeýdi dereý toqtatýy qajet. “Orazam báribir buzyldy” dep tamaqtanýdy jalǵastyrýǵa bolmaidy.
Qusýǵa qatysty úkim qandai?
Eriksiz qusý orazany buzbaidy. Al adamnyń ózin ádeii qustyrýy, sonyń ishinde aýyz toltyryp qusýy orazany buzady. Mundai jaǵdaida sol kúnniń qazasy óteledi. Demek, eriksiz bolǵan jaǵdai men adamnyń óz qalaýymen jasaǵan áreketiniń úkimi bólek.
Tis tazalaýǵa, dýshqa túsýge bola ma?
Tis tazalaýdyń ózi orazany buzbaidy. Biraq tis pastasyn nemese sýdy jutyp qoimaý kerek. QMDB tisti tań namazynyń ýaqyty kirgenge deiin tazalaǵan abzal ekenin túsindiredi.
Dýshqa túsý, aýyz ben muryndy shaiý da orazany buzbaidy. Degenmen sý tamaqtan ótip ketpeýin qadaǵalaý qajet. Oraza ekenin bile tura, aýyz shaiǵanda abaisyzda sý jutyp qoiý men orazasyn múlde umytyp sý ishýdiń úkimi birdei emes. Birinshi jaǵdaida qaza óteý qajet bolady.
Áiel adamnyń etekkiri nemese bosanǵannan keiingi qany kelse, sol kúngi orazasy buzylady. Ótkizip alǵan kúnderiniń qazasyn keiin óteidi.
Oraza buzylǵan jaǵdaida qaza óteý nemese káffarat qajettigi onyń qandai sebeppen buzylǵanyna bailanysty anyqtalady. Sondyqtan naqty jaǵdaidyń úkimin QMDB pátýa mamanynan suraǵan durys.
