Qazaqstan Prezidenti Qasym-Jomart Toqaev astanadaǵy «Ikomek109» monitoring jáne shuǵyl áreket etý ortalyǵyna bardy, dep habarlaidy "Ult aqparat" Aqordaǵa silteme jasap.
Ortalyq táýlik boiy qalanyń qaýipsizdigin baqylaidy, kommýnaldyq kásiporyndardyń barlyq Call-ortalyqtaryn biriktiredi jáne turǵyndardyń ótinishteri men usynystaryn óńdeýge múmkindik beredi.
Qazaqstan Prezidentine basqarý paneliniń múmkindigi kórsetildi. Munda 6 myńnan astam kamera qosylǵan, olar tótenshe jaǵdailarǵa, oqys oqiǵalarǵa shuǵyl áreket etip, olardy joiýǵa, sondai-aq, qalanyń tynys-tirshiligine monitoring júrgizýge múmkindik beredi.
Qasym-Jomart Toqaev memlekettik organdardyń qyzmetiniń negizgi tutynýshysy retinde halyqpen tiimdi keri bailanys jáne kommýnikatsiia ornatýy úshin zamanaýi tsifrlyq tehnologiiany qoldanýdyń mańyzdy ekenin atap ótti.
Memleket basshysy bul tájiribeni óńirlerge taratý qajettigin aitty.
Sondai-aq, Qazaqstan Prezidenti «Botaly» otbasy densaýlyǵy ortalyǵynda boldy.
Memleket basshysyna qalanyń alǵashqy meditsinalyq-sanitarlyq járdem jelisiniń damýy jáne «Úidegi dáriger» jobasynyń júzege asyrylýy jóninde málimet berildi.
Qasym-Jomart Toqaev azamattarǵa, ásirese, qala halqynyń turaqty ósý jaǵdaiynda meditsinalyq kómektiń sapasyn arttyrý jáne onyń qol jetimdi ári jaqyn bolýyn qamtamasyz etý qajettigin atap ótti.
Qazaqstan Prezidenti meditsinalyq kabinetterdi, jeńildikpen dári-dármekter beriletin dárihanany aralap kórdi. Sonymen qatar, zamanaýi tsifrlyq tehnologiiany qoldanatyn tirkeý bóliminiń jumysymen tanysty.
Sonymen qatar Qazaqstan Prezidenti Qasym-Jomart Toqaev Nur-Sultan qalasyndaǵy №68 mektep-gimnaziiaǵa bardy.
Memleket basshysyna elordadaǵy orta jáne mektepke deiingi bilim júiesiniń qazirgi ahýaly men onyń keleshek damý perspektivalary, sondai-aq, arnaiy bilim berýdi qajet etetin balalarǵa jasalǵan jaǵdai jóninde málimet berildi.
Qasym-Jomart Toqaevqa Nur-Sultan qalasyndaǵy bilim berý mekemelerinde júrgizilip jatqan tsifrlandyrý jumystarynyń nátijeleri baiandaldy. Sonyń ishinde, balabaqshalarǵa kezekke qoiý jáne joldama berý, mektepke qabyldaý jáne mektepten mektepke aýysý, oqý ornyna kirýge arnalǵan biryńǵai elektrondy karta jáne oqýshylardyń tamaǵy men jolaqysy úshin aqshasyz tólem júiesin engizý siiaqty úderisterdi onlain formatyna kóshirý jóninde aityldy.
Sonymen qatar, Qazaqstan Prezidenti mektep-gimnaziiadaǵy «Shuǵyla» komiýniti ortalyǵy» qosymsha bilim berý ortalyǵynyń jumysymen tanysty. Ol astanadaǵy Oqýshylar saraiynyń filialy sanalady.
Munda balalardyń qabiletin damytýǵa arnalǵan 5 stýdiia men 13 úiirme tegin jumys isteidi. Bul úiirmelerge onlain júiesi arqyly jazylýǵa bolady.
.jpeg)