kórneki sýret
QR Prezidenti Qasym-Jomart Toqaev Úkimettiń keńeitilgen otyrysynda bir adamnyń qansha jerge ielik ete alatynyn normativpen bekitýdi tapsyrdy, dep habarlaidy QazAqparat.
«Jerdi utymdy paidalaný máselesindegi mańyzdy mindetterdiń biri – onyń bir qolǵa shoǵyrlanýyna jol bermeý. Men bul týraly buryn da aitqanmyn. Bul jerde men ónimniń emes, jerdiń shoǵyrlanýyn aityp otyrmyn. Neǵurlym kóbirek jer alyp, biraq investitsiia salmaityndar bar. Birqatar óńirde máslihat sheshimimen úles mólsheri ǵylymi negizdelgen tásildersiz bekitilgen. Atyraý oblysynda bir adamǵa - 89 myń gektar, Almaty oblysynda - 96 myń gektar, Shyǵys Qazaqstan oblysynda - 69 myń gektar jer bólinip ketken. Al aýyl sharýashylyǵy ministrligi bir qolda 98 myń gektarǵa deiin aýyl sharýashylyǵy jerin ustaýǵa ruqsat beretin qaýly jobasyn ázirledi. Bul - qazir qolynda aýqymdy alqaptary bar adamdardyń ieligin saqtap qalý áreketine uqsaidy. Iaǵni, osy úrdisti normativtik baza retinde bekitýge talpyný», - dedi Qasym-Jomart Toqaev.
Onyń aitýynsha, memleket bir adamnyń aýqymdy jer ýchaskelerine ielik etýine qarsy emes.
«Munyń jaqsy jaǵy bar. Ekonomikalyq ainalymǵa jer kóbirek túsedi, ondai aýqymnyń tiimdiligi de bolady – básekege qabilet artady. Oǵan qarymta qatań mindettemeler, jerdi naqty paidalaný jaýapkershiligi bolýy kerek. Sondyqtan Úkimetke jer ýchaskeleriniń shekti mólsherin anyqtaý úshin sarapshylar men ǵylymi institýttardyń qatysýymen jumys tobyn qurýdy tapsyramyn. Ony osy jyldyń 1 mamyryna deiin bekitý kerek», - dedi Prezident.
