Memleket basshysy agroónerkásip keshenin damytý isindegi naqty máselelerdiń bar ekenine nazar aýdaryp, Úkimet pen jergilikti atqarýshy organdardyń aldyna birqatar mindet qoidy, dep habarlaidy "Ult aqparat" Aqordaǵa silteme jasap.
Atap aitqanda, Qasym-Jomart Toqaev álemde turaqty ári joǵary suranysqa ie tiimdiligi joǵary daqyldardy (jasymyq, zyǵyr, soia) ósirýge kóshý esebinen eńbek ónimdiligin arttyrý qajettigin aitty. Onyń aitýynsha, organikalyq aýyl sharýashylyǵy óndirisin damytyp, zamanaýi agrotehnologiia men innovatsiiany engizý kerek.
– Úkimet agrohimiia qyzmetin kúsheitý, gerbitsidterdiń, mineraldy tyńaitqyshtardyń jáne elitalyq tuqymdardyń qoljetimdiligin qamtamasyz etý jóninde túbegeili sharalar qabyldaýy qajet, – dedi Prezident.
Memleket basshysy Úkimetke óndiristiń el aýmaǵynda ornalasý áleýetin zertteý arqyly aýyl sharýashylyǵy tehnikalary parkiniń tozýyna qatysty máseleni sheshýdi tapsyrdy.
Álemdik tájiribeni eskere otyryp mineraldaý negizinde topyraqtyń qunarlylyǵyn jaqsartý – mańyzdy mindet. Memleket basshysy bul máseleni sheshý úshin sheteldik investorlardy tarta otyryp, el aýmaǵynda tyńaitqyshtar men pestitsidter shyǵaratyn daiyn litsenziiasy bar zaýyttar salýdy tapsyrdy.
Prezident barlyq aýyl sharýashylyǵy jerleriniń esebin alý isin aiaqtaýdyń, jer kadastryn tsifrlandyrýdyń jáne jerlerdiń paidalanylýyn ǵaryshtyq monitoring jasaý arqyly anyqtaýǵa kóshýdiń mańyzdylyǵyna arnaiy toqtaldy.
Baiandamada mal sharýashylyǵyn damytý máselesine zor kóńil bólindi. Memleket basshysy qoi etin, qus etin, qozy etin óndirýdiń, sútti mal sharýashylyǵyn damytýdyń jáne mal sharýashylyǵy ónimin eksportqa shyǵarý isin ilgeriletýdiń keleshegi bar dep esepteidi. Bul úshin aldaǵy 10 jylda qosymsha 50 million gektar jaiylymdyq jer paidalanýǵa beriledi. Sonymen qatar Prezident Úkimetke jem-shóp baǵasynyń joǵary bolý sebebine qatysty máseleni túbegeili retteýdi tapsyrdy.
Qasym-Jomart Toqaev elimizdiń qaita óńdelgen ónimderi syrtqy naryqta kedergilerge tap bolyp jatqanyn aitty. Osyǵan bailanysty Memleket basshysy otandyq taýarlardy maqsatty túrde ilgeriletýdi jáne sheteldik seriktesterdegi ózgeristerge qatysty der kezinde áreket etýdi tapsyrdy.
Memleket basshysy otandyq agrarlyq ǵylymdy damytý isine jáne keiingi jyldary deńgeii aitarlyqtai tómendegen kadrlardyń áleýetine arnaiy toqtaldy.
– Ulttyq agrarlyq ǵylym-bilim ortalyqtaryndaǵy eńbekkerlerdiń tek 20 paiyzynyń ǵylymi dárejesi bar. Sondyqtan agrarlyq salada bolashaǵy bar jas ǵalymdardyń pýlyn jasaqtaý qajet, – dedi Qasym-Jomart Toqaev.
Qazaqstan Prezidenti aýyl halqynyń 85 paiyzy turatyn keleshegi bar tirek eldi mekenderdi damytý qajettigin aitty. Onyń aitýynsha, bul eldi mekender jol, qol jetimdi bailanys júiesi men Internet, bilim berý jáne densaýlyq saqtaý nysandary, mádeniet jáne sport keshenderi siiaqty infraqurylymdarmen qamtamasyz etilýi tiis.
Memleket basshysy aýyldyq jerlerde buqaralyq sportty damytý úshin 3 jyl ishinde 100 dene shynyqtyrý jáne saýyqtyrý keshenderin salýdy tapsyrdy. Sonyń ishinde 22 nysan biyl iske qosylady.
Elbasy usynǵan «Aýyl – el besigi» jobasy aiasynda qosymsha 90 milliard teńge bólinetin bolady. Prezident «Diplommen aýylǵa» baǵdarlamasyna bólinetin qarjyny jylyna 20 milliard teńgege deiin arttyrýdy tapsyrdy.
Sondai-aq, Qasym-Jomart Toqaev aýyl turmysynyń sapasyn jaqsartý jóninde júieli sharalar qabyldaýdyń mańyzdylyǵyn atap ótti.
– Aýyl sharýashylyǵy kásiporyndary, ásirese irileri shette qalmaýy tiis. Agrariler memlekettik-jekemenshik seriktestigi qaǵidatyna sáikes aýyl turǵyndarynyń ómir súrý sapasyn jaqsartýǵa qatysty áleýmettik jaýapkershilikti bólisýi qajet, – dedi Memleket basshysy.
Respýblikalyq keńes barysynda Aýyl sharýashylyǵy ministri Saparhan Omarov, «Zenchenko i K» kommandittik seriktestiginiń direktory Gennadii Zenchenko, «Agrofirma «Rodina» JShS-niń bas direktory Ivan Saýer, «QazEksportAstyq» AQ direktorlar keńesiniń tóraǵasy Rýslan Moldabekov, S.Seifýllin atyndaǵy Qazaq agrotehnikalyq ýniversitetiniń rektory Aqylbek Kúrishbaev jáne «Bioperations» JShS quryltaishysy Álihan Talǵatbek baiandama jasady.
