Foto: Májilis
Májilis depýtaty Temir Qyryqbaev balalar lagerlerindegi qaýipsizdik máselesin kóterip, QR Premer-Ministriniń orynbasary – Mádeniet jáne aqparat ministri Aida Balaeva atyna depýtattyq saýal joldady, dep habarlaidy Ult.kz.
Depýtattyń aitýynsha, jaz mezgilinde Qazaqstan boiynsha ondaǵan myń bala jazǵy lagerlerde demalýdy josparlaidy. Sondyqtan balalardyń qaýipsizdigi men sapaly demalysyn qamtamasyz etý memleket úshin mańyzdy mindet bolýy tiis. Alaida sońǵy jyldary elimizdegi birqatar lagerlerde óreskel zańbuzýshylyqtar tirkelgen.
"Almaty qalasyndaǵy «Arman dala» lagerinde aýmaqta saýna, meiramhana, kompiýterlik klýb jumys istegen. Balalar edende uiyqtaýǵa májbúr bolyp, uldar men qyzdar bir bólmede ornalastyrylǵan.
Mańǵystaý oblysyndaǵy «Ainalaiyn» lageri («Ózenmunaigaz» qyzmetkerleriniń balalary úshin) – oryn tapshylyǵy saldarynan balalar eki adamnan bir tósekte nemese edende uiyqtaǵan. Qaýipsizdik normalary óreskel buzylǵan.
Túrkistan oblysyndaǵy «Arman» lagerinen 400 bala ata-analardyń jappai narazylyǵy men jaǵdaidyń qanaǵattanarlyqsyz bolýyna bailanysty merziminen buryn evakýatsiialanǵan.
Shymkent qalasyndaǵy «Úsh bulaq» lagerinde belgilengen syiymdylyq normasy asyra oryndalǵan", - dep otyr Qyryqbaev.
Temir Qyryqbaev mundai jaǵdailar balalar demalysy salasynda júieli problemalardyń bar ekenin kórsetetinin aitty. Onyń sózinshe, «AMANAT» partiiasynyń sailaýaldy baǵdarlamasy aiasynda balalar lagerlerin litsenziialaý máselesi negizgi basymdyqtardyń biri retinde qarastyrylǵan.
Depýtat 2026 jyldyń 1 sáýirinen bastap balalar lagerlerin litsenziialaý júiesi engizilgenin eske saldy. Endigi basty mindet – qabyldanǵan normalardyń tiimdi oryndalýyn qamtamasyz etý.
"Balalar lageri – tek demalys orny emes. Ol – tulǵa qalyptasatyn, áleýmettik daǵdylar damityn mańyzdy orta. Biraq kóptegen ata-analar joldamalardyń qymbat ekenin, sapasyna kepildik joǵyn jáne óz óńirlerinde lager jetispeitinin aityp shaǵymdanýda", – dedi depýtat.
Osyǵan bailanysty Temir Qyryqbaev litsenziiadan ótken jáne balalardy qabyldaýǵa daiyn uiymdardyń naqty tizimin jariialaýdy surady. Sonymen qatar mektep janyndaǵy lagerlerdi eseptemegende, óńirlerdiń balalar demalysy uiymdarymen qamtylýyna taldaý júrgizýdi usyndy.
Depýtat balalardyń qaýipsizdigin kúsheitý úshin birneshe naqty shara usyndy.
"Birinshiden. Bala quqyqtary jónindegi ýákilderdiń, jurtshylyqtyń jáne ata-analar qaýymdastyǵynyń qatysýymen litsenziialaý júiesine jatpaityn balalar lagerlerine turaqty táýelsiz monitoring engizý.
Ekinshiden. Balalardyń lagerde demalýy kezinde qaýipsizdik talaptaryn buzǵany úshin baqylaýshy organdar basshylary men lager ieleriniń derbes jaýapkershiligin belgileý.
Úshinshiden. Balalardyń bos ýaqytyn uiymdastyrýǵa bólinetin biýdjet qarajatyn jumsaýdyń ashyqtyǵyn qamtamasyz etý", - dedi májilismen.
