QR Premer-Ministriniń orynbasary Eraly Toǵjanovtyń tóraǵalyǵymen Memleket basshysynyń tapsyrmasy boiynsha qurylǵan Jer reformasy jónindegi komissiianyń ekinshi otyrysy ótti, dep habarlaidy "Ult aqparat" primeminister.kz saityna silteme jasap.
Sanitarlyq talaptarǵa sáikes is-sharaǵa tek komissiia músheleri qatysty. Komissiia quramynda QR Parlament depýtattary, oblystardyń ákimderiniń agroónerkásip kesheni máselelerine jetekshilik etetin orynbasarlary, Ulttyq qoǵamdyq senim keńesiniń músheleri, fermerler, salalyq birlestikter men fermerler odaǵynyń, «Atameken» UKP-nyń ókilderi, qoǵam qairatkerleri, saiasattanýshylar, jýrnalister men blogerler bar. Olardyń kópshiligi beinekonferentsiia bailanysy arqyly qatysty.
Sondai-aq, qazaqstandyqtar Aýyl sharýashylyǵy minstrliginiń resmi saity men YouTube kanalyndaǵy onlain-transliatsiiaǵa qosylyp, komissiianyń jumysyn baqylaýǵa múmkindik aldy. Azamattarǵa yńǵaily bolý úshin respýblikalyq «Habar24» telearnasynan tikelei efir uiymdastyryldy.
Otyrysty ashqan Eraly Toǵjanov komissiianyń maqsatyn aita kelip, aǵymdaǵy jyldyń 25 aqpan kúni Prezident Qasym-Jomart Toqaev Qazaqstannyń aýyl sharýashylyǵy jerlerin sheteldikterge berýge tolyq tyiym salý týraly túpkilikti saiasi sheshim qabyldaǵanyn eske saldy. Sondai-aq, ol qazirgi tańda komissiia aldynda aýyl sharýashylyǵy salasyndaǵy jer qatynastaryn damytý máseleleri boiynsha usynymdar ázirleý mindeti turǵanyn jetkizdi.
«Zań jobasynyń birinshi oqylymy Májiliste 7 sáýir kúni ótedi. Buny aityp otyrǵan sebebim, ózderińizge belgili, kópshilik arasynda, ásirese, áleýmettik jelilerdi áli de jekelegen túsinispeýshilikter kezdesýde. Jalǵan qaýesetti ádeii taratýshylar da joq emes ekenin aitýymyz kerek. Sondyqtan, taǵy bir naqtylap aitamyn: jerdiń sheteldikterge berilmeitini jóninde naqty sheshim qabyldandy. Memleket basshysy Qasym-Jomart Kemeluly qoǵam tarapynan kóterilip otyrǵan negizgi máseleler boiynsha túiindi sheshimin aitty, núktesin qoidy», — dedi Jer reformasy jónindegi komissiianyń tóraǵasy.
Odan keiin komissiia músheleri birinshi otyrystyń qorytyndysy boiynsha ázirlengen usynystardy qaraýǵa kóshti.
25 naýryzdaǵy birinshi otyrysta aitylǵan usynystarǵa sáikes, komissiia jumysynyń tiimdiligin arttyrý maqsatynda eki jumys toby quryldy. Ekonomikalyq máseleler jónindegi jumys tobynyń jetekshisi Parlament Senatynyń depýtaty Aqylbek Kúrishbaev boldy. Oǵan komissiianyń 33 múshesi kirdi. Quqyqtyq máseleler jónindegi topty Májilis depýtaty Erlan Barlybaev basqardy. Oǵan 21 adam qosyldy.
Moderator budan bólek 25 naýryzdaǵy otyrys qorytyndysy boiynsha barlyǵy 55 usynys, onyń ishinde 11 uiymdastyrýshylyq, sondai-aq 29 ekonomikalyq jáne 15 quqyqtyq sipattaǵy usynys kelip túskenin habarlady. Olardyń barlyǵy komissiia músheleriniń, ýákiletti organdardyń jáne fermerlik qoǵamdastyq ókilderiniń qatysýymen jumys toptarynda talqylanýda.
Usynystardy qaraý nátijeleri týraly jumys toptarynyń jetekshileri A. Kúrishbaev pen E. Barlybaev habarlady.
Olardyń aitýynsha, kópshilik daýyspen sheteldikterge jáne sheteldik kompaniialarǵa, sheteldik qatysý úlesi bar kompaniialarǵa, azamattyǵy joq adamdarǵa, halyqaralyq qatysýy bar ǵylymi ortalyqtarǵa, sondai-aq qandastarǵa aýyl sharýashylyǵy jerlerin berýge tyiym salý jónindegi zań jobasy qabyldanǵannan keiin qazaqstandyqtarǵa jalǵa beriletin aýyl sharýashylyǵy maqsatyndaǵy jer ýchaskeleriniń shekti eń joǵary mólsherlerin bekitý týraly Úkimet qaýlysyn qabyldaý týraly usynys qoldaý tapty.
Ekinshi jumys toby jerdi paidalaný men qorǵaýdy memlekettik baqylaý fýnktsiialaryn QR Aýyl sharýashylyǵy ministrliginiń Jer resýrstaryn basqarý komitetiniń qaramaǵyna qaitarýdy qup kórdi.
2014 jyldan bastap jerdiń paidalanylýy men qorǵalýyn memlekettik baqylaý fýnktsiialary jergilikti atqarýshy organdarǵa júkteldi, al 2018 jyly aýdan ákimderine baqylaý fýnktsiialary berildi.
Sonymen qatar, barlyq salalarda baqylaý-qadaǵalaý fýnktsiialaryn júzege asyrý tájiribesi baqylaý organdarynyń (ortalyq-oblys-aýdan) barynsha tiimdiligin kórsetedi.
«Salystyrmaly taldaý kórsetkendei, 2013 jyldan beri jerdi paidalaný jáne qorǵaý máseleleri boiynsha ákimdikter júrgizgen tekserýler sany 2,6 esege, al anyqtalǵan zań buzýshylyqtardy joiý 4,5 esege artqan», — dedi máseleniń ózektiligin túsindirgen Erlan Barlybaev.
Onyń aitýynsha, jerdi paidalaný men qorǵaýdy baqylaý fýnktsiialaryn ortalyq ýákiletti organǵa berý máselesin Parlament depýtattary, Bas prokýratýra, Joǵarǵy sot, «Atameken» UKP jáne taǵy basqalar kóterip otyr.
Sonymen qatar, quqyqtyq máseleler jónindegi jumys tobynyń músheleri Baqytjan Bazarbek kótergen jerdiń nysanaly maqsatyn baǵbandyqtan basqa maqsattarǵa ózgertýge zańnamalyq turǵyda tyiym salý týraly bastamasyn qoldady.
Jer reformalary jónindegi komissiia músheleri aitylǵan usynystar boiynsha daýys berdi. Budan bólek, Qoldau platformasyn Qarjy ministrliginnen alyp, QR Aýyl sharýashylyǵy ministrliginiń qaramaǵyna berý jáne ony «Aýyl sharýashylyǵy janýarlaryn cáikestendirý» aqparattyq júiesimen integratsiialaý máseleleri qaraldy.
Otyrys sońynda jiynǵa qatysýshylar qoǵam ókilderi arasynan tóraǵa orynbasaryn sailaýdy usyndy. Ashyq daýys berý nátijesinde «Qazaqstan fermerler odaǵy» RQB-niń prezidenti Jigýli Dairabaev komissiia tóraǵasynyń orynbasary bolyp sailandy.
