Tanymal prodiýser Gúlzira Aidarbekova ómirden ótken anasyna degen saǵynyshyn bildirip, áleýmettik jelidegi oqyrmandarymen júrekjardy jazbasyn bólisti, dep habarlaidy ult.kz.
Óner iesi Instagram paraqshasynda marqum anasynyń beinesi qoldanylǵan áserli video jariialady. Beinejazbada Gúlzira Aidarbekova aspanǵa qarap otyrǵan sátte anasy qasynda turǵandai beinelengen. Ol qyzyna meiirimmen kóz tastap, basynan sipap turǵandai áser qaldyrady.
Prodiýser jazbasynda anasynyń ornyn eshkim basa almaitynyn jetkizip, onyń perzenti bolyp dúniege kelgenine shúkirshilik etti.
“Anashym, jannatym! Janymda júrmeseńiz de, júregimdesiz! Sizdiń qyzyńyz bolǵanym úshin Allaǵa sansyz shúkir aitamyn. Taǵy da ómirge qaita keler bolsam, ózgeni emes, shynshyl, jigerli, meiirimdi, eńbekqor týra ózińizdi esh oilanbastan qaita tańdar edim”, – dep jazdy ol.
Sondai-aq Gúlzira Aidarbekova juma kúni dúnieden ótken jaqyndaryn duǵamen eske aldy. Ol ata-anasy men ata-ájesine, ómirden ozǵan baýyrlaryna Alladan raqym tilep, olardyń jany jánnatta bolýyn surady.
Óner iesi anasynyń beinesin video arqyly qaita jańǵyrtqan paraqsha iesine de rizashylyǵyn bildirdi. Onyń aitýynsha, beinejazba dál anasyn saǵynyp, oiǵa shomyp otyrǵan sátinde aldynan shyqqan.
“Anashymnyń kóz aldymdaǵy máńgilik elesin týra jasaǵanyńyz úshin raqmet! Anashymdy oilaǵanym sol, juma kúni týra aldymnan jasaǵan videońyz shyǵa keldi. Bul da bolsa Allanyń qalaýymen shyǵar, bálkim, meni ishtei qinalyp júr dep esine alǵan bolar jan anam”, – dedi prodiýser.
Gúlzira Aidarbekova anasynyń boiyndaǵy adaldyqty, qaisarlyqty, eńbekqorlyq pen meiirimdi erekshe baǵalaitynyn jetkizdi. Jaqynynan aiyrylǵanyna qaramastan, onyń jarqyn beinesi júreginde máńgi saqtalatynyn bildirdi.
Prodiýserdiń bul jazbasy ananyń orny men perzenttik saǵynyshtyń qanshalyqty tereń ekenin taǵy bir márte kórsetti.
Gúlzira Aidarbekova kim?
Gúlzira Aidarbekova – qazaqstandyq prodiýser, kásipker jáne tanymal ánshi Qairat Nurtastyń anasy. Ol 1968 jyly 12 sáýirde dúniege kelgen. Balalyq shaǵy qazirgi Túrkistan oblysyndaǵy Shornaq aýylynda ótken. Gúlzira otbasyndaǵy segiz balanyń jetinshisi bolyp ósken. Jas kezinde otbasyna kómektesý úshin eńbek etip, gazet taratýmen ainalysqan. Onyń jubaiy – Nurtas Aidarbekov. Erli-zaiyptylar Qairat, Aian jáne Zańǵar esimdi úsh ul tárbielep ósirgen. Gúlzira Aidarbekova kópshilikke uly Qairat Nurtastyń prodiýseri retinde keńinen tanyldy. Ol ánshiniń shyǵarmashylyq jolynyń qalyptasýyna jáne úlken sahnaǵa shyǵýyna eleýli úles qosty. 2008 jyly Qairat Nurtaspen birge Kairat Nurtas Production prodiýserlik ortalyǵyn qurdy. Prodiýser ánshiniń kontsertterin uiymdastyryp, shyǵarmashylyǵyn nasihattaýmen ainalysty. Sonymen qatar kásipkerlik salasynda da ózin tanytty.
Gúlzira Aidarbekova kino salasyna da aralasyp, “Arman” filminiń prodiýserleriniń biri boldy. 2025 jyly ol Qairat Nurtastyń prodiýserlik qyzmetinen ketip, shyǵarmashylyq tizgindi ulynyń ózine tapsyrǵanyn málimdedi. Degenmen ánshiniń óner jolyn syrttai baqylap, qajet kezde aqyl-keńesin berip otyratynyn jetkizdi.
