Ánshi Sáken Maiǵaziev anasynyń kópshilikke aq tilegin arnaǵan sońǵy videosy týraly aityp, aýylǵa barǵan saiyn onyń janynda kóbirek bolýǵa tyrysqanyn jetkizdi, dep habarlaidy ult.kz.

Óner iesiniń sózinshe, anasynyń jurtqa izgi tilegin jaýdyrǵan sátin áleýmettik jelidegi paraqshasynda bólisken. Sol jazbada ánshiniń anasy barshaǵa aq batasyn arnaǵan.

“Barshańyzǵa aq tilegin jaýdyrǵan. Men áleýmettik jelige salǵan edim, sońǵy ret”, – dedi ánshi.

Sáken Maiǵaziev aýylǵa barǵan kezderinde anasyna ýaqyt bólip, qasynda bolýǵa tyrysqanyn da aitty. Ánshi úshin elge saparynyń mańyzdy bóligi anasymen júzdesip, janynda otyrý bolǵan.

Sondai-aq óner iesi anasynyń jaǵdaiyna alańdap, áleýmettik jeli arqyly halin suraǵan jandar týraly sóz qozǵady. Onyń áńgimesinen anasyna degen perzenttik yqylasy men kópshiliktiń kórsetken qamqorlyǵy ańǵarylady.

Aita keteiik, Sáken Maiǵaziev anasyn eske alyp, kózine jas aldy.

Sáken Maiǵaziev kim?

Sáken Qordabaiuly Maiǵaziev — qazaq estradasynyń tanymal ánshisi, “MýzART” tobynyń múshesi, Qazaqstannyń eńbek sińirgen qairatkeri. Ol 1975 jylǵy 1 qańtarda qazirgi Túrkistan oblysynyń Sozaq aýdanynda dúniege kelgen. 2001 jyldan bastap “MýzART” ansambliniń quramynda óner kórsetip keledi. 2013 jyly Qazaqstannyń eńbek sińirgen qairatkeri ataǵyn alǵan. Sondai-aq “Daryn” memlekettik jastar syilyǵynyń iegeri. 

Óner iesi ánshilikpen qatar ustazdyq jáne basqarýshylyq qyzmetter atqarǵan. 2018–2020 jyldary T. Júrgenov atyndaǵy Qazaq ulttyq óner akademiiasynda shyǵarmashylyq jumystar jáne halyqaralyq bailanystar jónindegi prorektor bolǵan.