QR Premer-Ministrdiń orynbasary Eraly Toǵjanov Táýelsizdiktiń 30 jyldyǵy aiasynda atqarylatyn jumystardy atady, dep habarlaidy QazAqparat.
«Biyl erekshe jyl – Táýelsizdigimizdiń 30 jyldyǵy. Táýelsizdikten asqan eshqandai qundylyq joq dep oilaimyz. Sondyqtan 30 jyldyń ishindegi eldiń jetistigin, sonyń ishinde biyl osy mańyzdy mereitoidy atap ótýdi birlese talqylaimyz», - dedi E. Toǵjanov atalǵan Aqparat ministrliginiń keńeitilgen alqa májilisinde.
Úkimet basshysynyń orynbasary biraz ministrlikterdiń qatysýymen tiisti talqylaýlar bolǵanyn, aldaǵy ýaqytta Prezident Qasym-Jomart Toqaevtyń tóraǵalyǵymen jiyndar josparlanyp otyrǵanyn aitty.
«Bul taqyrypqa erekshe kóńil bólinip otyr. Oǵan bailanysty memlekettik úlken komissiia qurylǵanyn jaqsy bilesizder. Sondyqtan osy baǵytta biraz jumys isteitin bolamyz. Ózderińiz bilesizder, Prezident Táýelsizdik mereitoiyn atap ótýdiń basty qaǵidalaryn atap kórsetti. Onyń ishinde birigip jaǵymdy ózgerister men utymdy reformalar jasaityn jyl dep qabyldanýy kerek. Ekinshiden, azamattardyń naqty máselelerin, eń aldymen, áleýmettik máselelerdi sheshetin kezeń dep qabyldaýǵa bolady. Josparlanǵan is-sharalardy joǵary deńgeide iske asyrýǵa kúsh salyp, Táýelsizdik jyldary qol jetkizilgen nátijelerimizdi el ishinde de, halyqaralyq deńgeide de taratýymyz kerek», - dedi Eraly Toǵjanov.
.jpeg)