QR Premer-Ministriniń orynbasary Eraly Toǵjanov Eńbek jáne halyqty áleýmettik qorǵaý ministrliniń keńeitilgen alqa májilisinde kvazimemlekettik kompaniia basshylary men jumysshylardyń ailyǵyndaǵy aiyrmashylyqty qysqartý týraly pikir bildirdi, dep habarlaidy QazAqparat.
«Eńbek tabysynyń disbalansyn joiý qajet. Onyń ishinde memlekettik qoldaý sharalarymen qamtylǵan kásiporyndarǵa qyzmetkerleriniń tabysyn arttyrýǵa baǵyttalǵan qarymta jaýapkershilikter júktelýi kerek», - dedi Úkimet basshysnyń orynbasary.
Onyń aitýyna qaraǵanda, basshylar men óndiriste ter tógip júrgen jumysshylardyń ailyǵyndaǵy aiyrmashylyqty qysqartý máselesin jan-jaqty pysyqtaý qajet.
«Búkil kompaniialarda, sonyń ishinde kvazimemlekettik sektorda da basshylyq laýazymdaǵy qyzmetshiler men óndiristegi personaldyń ailyǵyndaǵy aiyrmashylyqty qysqartý týraly usynysty pysyqtaý qajet. Bul endi ońai másele emes. Bul jerde biraz másele bar ekenin jaqsy bilemiz. Kásipodaq ókilderi de bul máseleni kóterip jatyr. Sondyqtan ony birge qarastyrýǵa biz daiynbyz», - dedi Eraly Toǵjanov.
