Kazakhstan Petrochemicals JShS "QazAzot" AQ aktsiiasynyń 85 paiyzyn satyp aldy, - dep habarlaidy Tengrinews.kz agenttigi.
"QazAzot" baspasóz qyzmeti málimetinshe, aktsiia satyp alý boiynsha mamandandyrylǵan saýda-sattyq 2021 jyly 10 jeltoqsanda ótken. Belsendi ótinimder kólemi 85 000 qarapaiym aktsiia boldy. Al berilgen ótinimder boiynsha ortasha baǵa 788 858,82 teńge boldy.
"Saýda-sattyq qorytyndysy boiynsha aktsionerlik qoǵamnyń qarapaiym aktsiialarynyń 85 paiyzyn Kazakhstan Petrochemical JShS satyp alǵan, 15 paiyzy burynǵy iesi Baharidin Ábilázimovte qalǵan. Osylaisha, Joint Resources AQ (100 paiyz Timýr Qulybaevqa tiesili), Dinmuhamed Ydyrysov jáne Erjan Dostybaev óz aktsiialaryn satty", - delingen habarlamada.
Sonymen qatar, byltyr jeltoqsannyń aiaǵynda "QazAzot" AQ direktorlar keńesiniń quramy ózgerdi. Jańa quramǵa sailanǵandar: Áblázimov B.N. - direktorlar keńesiniń múshesi, direktorlar keńesiniń tóraǵasy, Aiazbaev R.R. - direktorlar keńesiniń múshesi, Isqaziev K.O. - direktorlar keńesiniń múshesi, táýelsiz direktor, Ibrashev K.N. - direktorlar keńesiniń múshesi, táýelsiz direktor, Maýleshev A.A. - direktorlar keńesiniń múshesi. Engizilgen ózgeristerge sáikes, "QazAzot" AQ direktorlar keńesi bes adamnan quralǵan.
"QazAzot" - ammiak pen ammiak selitrasyn óndirýshi ári eksporttaýshy. Kásiporyn Mańǵystaý oblysynda ornalasqan.
Joint Resources - investitsiialyq qyzmetpen jáne aktivterdi basqarýmen ainalysatyn kompaniia. KASE málimeti boiynsha, kompaniia aktsiiasynyń 100 paiyzy Timýr Qulybaevqa tiesili.
Eske sala keteiik, Qazaqstanǵa tanymal biznesmen, Nursultan Nazarbaevtyń kúieý balasy Timýr Qulybaev "Atameken" Ulttyq kásipkerler palatasynyń basshysy qyzmetinen ketken edi.
Al, Baharidin Ábilázimov búlik kezinde zardap shekken kásipkerlerdi qoldap, "Kúshimiz birlikte" qoryna 500 million teńge aýdarǵan bolatyn.
