Ýkraina Parlamentindegi "Batkivshina" fraktsiiasy jetekshisiniń orynbasary, prezidenttikke kandidat Iýliia Timoshenkonyń sailaý shtabynyń ókili Sergei Sobolev Ýkraina Ortalyq sailaý komissiiasyn sailaýshylardyń Timoshenkoǵa bergen daýysyn eldiń qazirgi prezidenti ári prezidenttikke kandidat Petr Poroshenkonyń paidasyna burmalady dep aiyptady.
Sobolevtiń sózinshe, Timoshenkonyń sailaý shtabynyń esebinshe, olardyń kandidaty alǵashqy týrda qazirgi prezidentten artyq daýys alǵan.
"Biz daýys sanaýdy qatar júrgizdik jáne OSK daýys sanaýdy kesheýildetip otyrǵanda osy sátke deiin móri "keppegen" hattamalardyń 63,51 paiyzyn qorytyp úlgerdik. Bizdiń ol sanaǵymyz boiynsha, Vladimir Zelenskii 28,1 paiyz, Iýliia Timoshenko – 16,1 paiyz, al Petr Poroshenko – 15,2 paiyz daýys alǵan" dedi Sobolev.
Onyń sózinshe, OSK daýys berýge qansha sailaýshy qatysqany týraly málimetti tórt saǵat boiy jariia etpei, daýys berý qorytyndysyn jariialai bastaǵan. "Osyǵan bailanysty biz daýysty bilik kandidatynyń (Petr Poroshkenkonyń) paidasyna burmalap jatyr dep kúdiktenemiz" dep málimdedi Timoshenko shtabynyń ókili.
Iýliia Timoshenko buǵan deiin Ýkrainadaǵy prezident sailaýy týraly jariialanǵan, kóbi OSK málimetterimen uqsas ekzit-pol qorytyndylaryn "múlde ádiletsiz, burmalanǵan" dep málimdedi.
Petr Poroshenkonyń sailaý shtabynyń ókilderi óz kandidattary ekinshi týrda jeńiske jete alady dep sanaidy.
"Kandidattardyń barlyǵyn Petr Poroshenkonyń jeńisi týraly jańalyqty sabyrmen qabyldaýǵa shaqyramyz. Ekinshi týrǵa óte almaǵan demokratiialyq kúshterdiń kandidattaryn demokratiiashyl jáne eýropashyl kandidattardy qoldaýǵa shaqyramyz" dedi Poroshenko shtabynyń ókili Maksim Savrasov.
Reseishil kandidat Iýrii Boiko buǵan jaýabynda sailaýdyń ekinshi týrynda Poroshenkony da, Zelenskiidi de qoldamaitynyn málimdedi.
Halyqaralyq jáne ýkrainalyq baqylaýshylar Ýkraina prezidenti sailaýynda burmalaý nemese zań buzý faktileri baiqalmaǵany týraly málimdegen.
31 naýryzda Ýkraina prezidenti sailaýy ótti. Ulttyq ekzit-pol qorytyndysy boiynsha, sailaýǵa túsken 39 kandidattyń arasynan ózgelerden kóp daýys alǵan 41 jastaǵy shoýmen Vladimir Zelenskii men qazirgi prezident 52 jastaǵy Petr Poroshenko sailaýdyń ekinshi týryna ótken.
Ýkraina OSK prezident sailaýyna daýys berýge resmi tirkelgen sailaýshylardyń 63,52% qatysqanyn málimdedi. Daýys sanaý áli jalǵasyp jatyr.
