Búgin Qazaqstan Qarýly Kúshteriniń barlyq óńirlerdegi áskeri bólimderi men quramalarynda mitingter ótkizildi. Onda jeke quram Qyzylorda oblysynda tikushaq apatynan qaza tapqan qyzmettesterine bir minýt únsizdikpen qurmet kórsetti, dep habarlaidy "Ult aqparat".
«Keshe oqý-jattyǵý barysynda QR QK tikushaǵynyń apatqa ushyraýy saldarynan bortta bolǵan 13 áskeri qyzmetshi kóz jumdy. Qazaqstan Qarýly Kúshteriniń barsha jeke quramy qaza bolǵan qyzmettesteriniń týysqandary men jaqyndarynyń qaiǵysyna ortaqtasyp, kóńil aitady. Bul - Qazaqstan armiiasy úshin orny tolmas qaiǵy. Olar aqtyq demderi qalǵansha ózderiniń áskeri boryshtaryn adal oryndady. Qyzmettesteri týraly jarqyn estelik batyrlyq, janqiiarlyq pen patriotizmniń úlgisi retinde áskeri qyzmetshilerdiń jadynda máńgi este qalady», - delingen Qorǵanys ministrliginiń resmi habarlamasynda.
Eske sala ketsek, QR IIM TJK baspasóz qyzmeti buǵan deiin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.
Qorǵanys ministrliginiń aqparatyna sáikes, atalǵan tikushaq 4 birdei áskeri tikushaq quramynan turatyn bólimmen birge Aqtaý qalasynan Shymkentke ushyp bara jatqan. Ushý sapary arnaiy bólimshelerdiń «Altyn jebe» keshendi oqý jáne jattyǵý aiasynda qarańǵyda ári kúrdeli meteorologiialyq jaǵdaida júrgizilgen.
Tikushaqta bolǵan 13 adam qaza tapty.
