Qyzylordadaǵy tikushaq apatynda qaza tapqan kishi serjant Ashat Abdýlmanattyń otbasy Taldyqorǵanda páter jaldap turyp jatqan. Marqum saparǵa attanarda Kaspii teńizi jaǵasynda sýretke túsip, dostaryna jibergen, dep habarlaidy QazAqparat tilshisi.
Ashat Abdýlmanat 1982 jyly Shyǵys Qazaqstan oblysynyń Aqtoǵai eldi-mekeninde týǵan.
Marqumnyń artynda anasy, jary jáne tórt balasy qaldy. 2010 jyly Taldyqorǵan qalasynan áskerge shaqyrylyp, odan keiin kelisimshart boiynsha áskeri qyzmetin jalǵastyrǵan. Qańtar aiynan bastap Aqtaý qalasyndaǵy 30153 áskeri bólimine aýysqan. Qala basshylary men aǵa býyn ókilderi marqumnyń otbasyna baryp, kóńil aityp shyqty. Taldyqorǵan ákimi Dastan Shaltabaev marqumdy aqtyq saparǵa shyǵaryp salý rásimine kómektesip, materialdyq jaǵynan da qoldaý kórsetiletinin aitty.
Al Ashattyń týystary jesir qalǵan kelinshek pen 4 balanyń baspana máselesin sheship berse degen tilegi bar.
«Bala-shaǵasy dalada qaldy. Balasynyń eń úlkeni - 13 jasta, kishisi 3 jasta ǵana. Olar qazir eshqaisysy da uǵyp ta jatqan joq. Keiin óskennen keiin suraityn shyǵar ákem qaida dep...», deidi sarbazdyń aǵasy Káken Baimýrzin.
Eske sala ketsek, QR IIM TJK baspasóz qyzmeti buǵan deiin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.
Qorǵanys ministrliginiń aqparatyna sáikes, atalǵan tikushaq 4 birdei áskeri tikushaq quramynan turatyn bólimmen birge Aqtaý qalasynan Shymkentke ushyp bara jatqan. Ushý sapary arnaiy bólimshelerdiń «Altyn jebe» keshendi oqý jáne jattyǵý aiasynda qarańǵyda ári kúrdeli meteorologiialyq jaǵdaida júrgizilgen.
Tikushaqta bolǵan 13 adam qaza tapty.
