Qyzylordadaǵy ushaq apaty kezinde aqtóbelik Daniiar Qońyrbaev kóz jumdy. Jergilikti ákimdik marqumnyń otbasyna kómek kórsetýge daiyn, dep habarlaidy QazAqparat tilshisi.
Qyzylorda oblysynyń Jalaǵash aýdanynda bolǵan tikushaq apaty kezinde aqtóbelik Daniiar Qońyrbai qaza boldy. 33 jastaǵy maiordyń artynda úsh balasy qaldy.
«Daniiar Qońyrbaidyń úsh balasy bar, eń kishkentaiy 3 ailyq. Ata-anasy Muǵaljar aýdanynyń Qarakól aýylynda turady. Aqtóbe oblysynyń ákimi Ońdasyn Orazalinniń tapsyrmasymen Daniiar Qońyrbaidyń otbasyna kómek kórsetiledi», - dep habarlady oblys ákiminiń baspasóz qyzmeti.
Búgin T.Bigeldinov atyndaǵy áýe qorǵanys kúshteri institýty arnaiy miting ótkizdi. Sebebi, qaza bolǵan áskeri qyzmetkerler Aqtóbedegi joǵary oqý ornynyń túlekteri.
«Qorǵanys ministrligi qaza bolǵan adamdardyń otbasyna kóńil aitady. Arnaiy miting ótip, bir minýt únsizdik jariialandy», - dedi T.Bigeldinov atyndaǵy áskeri áýe kúshteri institýtynyń basshysy Áli Ybyraev.
Eske sala ketsek, QR IIM TJK baspasóz qyzmeti buǵan deiin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.
Qorǵanys ministrliginiń aqparatyna sáikes, atalǵan tikushaq 4 birdei áskeri tikushaq quramynan turatyn bólimmen birge Aqtaý qalasynan Shymkentke ushyp bara jatqan. Ushý sapary arnaiy bólimshelerdiń «Altyn jebe» keshendi oqý jáne jattyǵý aiasynda qarańǵyda ári kúrdeli meteorologiialyq jaǵdaida júrgizilgen.
Tikushaqta bolǵan 13 adam qaza tapty.
