Úkimet otyrysynda Týrizm jáne sport ministri Erbol Myrzabosynov eldiń týristik áleýetin ilgeriletý baǵytyndaǵy jumystardy baiandap, nazardy dástúrli esepten góri tsifrlyq keńistikke burdy. Premer-ministr Oljas Bektenovke usynylǵan málimettiń ózegi – Qazaqstannyń týrizmin TikTok arqyly nasihattaý nátijeleri boldy, dep habarlaidy ult.kz.
Ministrliktiń aitýynsha, sońǵy ýaqytta iske qosylǵan jarnamalyq naýqandar TikTok pen Qunar platformalarynda 19 millionnan astam qaralym jinaǵan. Bir qaraǵanda bul – tek tsifrlyq statistika. Alaida búgingi zamanda bul kórsetkish eldiń halyqaralyq imidjine tikelei áser etetin «valiýtaǵa» ainalyp otyr.
Qazaqstannyń tabiǵaty men týristik áleýetin álemge tanytý úshin endi resmi baiandamalardan bólek, qysqa videolar, trendtik kontent pen algoritmge beiimdelgen jarnama aldyńǵy orynǵa shyqty. Iaǵni týrizm indýstriiasy dástúrli býkletterden TikTok-tyń jyldam ainalatyn lentasyna tolyq kóship barady.
Budan bólek, jyl basynan beri Úndistan, Qytai jáne Japoniiadan kelgen 27 sheteldik BAQ ókili men týroperatorlar úshin aqparattyq týrlar uiymdastyrylǵan. Bul – Qazaqstandy syrtqy naryqta tanytýǵa baǵyttalǵan klassikalyq, biraq áli de mańyzdy qural.
Ministrlik aldaǵy kezeńde Qytai naryǵynda arnaiy marketingtik jobalardy iske asyrýdy jáne Ońtústik Koreianyń iri onlain týristik platformasy – Hana Tour-pen yntymaqtastyqty keńeitýdi josparlap otyr. Bul qadamdar Qazaqstandy Aziia týristik kartasynda belsendirek kórsetýge baǵyttalǵan.
Degenmen negizgi suraq ashyq kúiinde qalady: 19 million qaralym naqty týrist aǵynyna qanshalyqty ainalady? Óitkeni tsifrlyq áser men shynaiy týristik aǵym – bir-birine teń uǵym emes.
