ٷكٸمەت وتىرىسىندا تۋريزم جەنە سپورت مينيسترٸ ەربول مىرزابوسىنوۆ ەلدٸڭ تۋريستٸك ەلەۋەتٸن ٸلگەرٸلەتۋ باعىتىنداعى جۇمىستاردى بايانداپ, نازاردى دەستٷرلٸ ەسەپتەن گٶرٸ تسيفرلىق كەڭٸستٸككە بۇردى. پرەمەر-مينيستر ولجاس بەكتەنوۆكە ۇسىنىلعان مەلٸمەتتٸڭ ٶزەگٸ – قازاقستاننىڭ تۋريزمٸن TikTok ارقىلى ناسيحاتتاۋ نەتيجەلەرٸ بولدى, دەپ حابارلايدى ult.kz.
مينيسترلٸكتٸڭ ايتۋىنشا, سوڭعى ۋاقىتتا ٸسكە قوسىلعان جارنامالىق ناۋقاندار TikTok پەن Qunar پلاتفورمالارىندا 19 ميلليوننان استام قارالىم جيناعان. بٸر قاراعاندا بۇل – تەك تسيفرلىق ستاتيستيكا. الايدا بٷگٸنگٸ زاماندا بۇل كٶرسەتكٸش ەلدٸڭ حالىقارالىق يميدجٸنە تٸكەلەي ەسەر ەتەتٸن «ۆاليۋتاعا» اينالىپ وتىر.
قازاقستاننىڭ تابيعاتى مەن تۋريستٸك ەلەۋەتٸن ەلەمگە تانىتۋ ٷشٸن ەندٸ رەسمي باياندامالاردان بٶلەك, قىسقا ۆيدەولار, ترەندتٸك كونتەنت پەن الگوريتمگە بەيٸمدەلگەن جارناما الدىڭعى ورىنعا شىقتى. ياعني تۋريزم يندۋستريياسى دەستٷرلٸ بۋكلەتتەردەن TikTok-تىڭ جىلدام اينالاتىن لەنتاسىنا تولىق كٶشٸپ بارادى.
بۇدان بٶلەك, جىل باسىنان بەرٸ ٷندٸستان, قىتاي جەنە جاپونييادان كەلگەن 27 شەتەلدٸك باق ٶكٸلٸ مەن تۋروپەراتورلار ٷشٸن اقپاراتتىق تۋرلار ۇيىمداستىرىلعان. بۇل – قازاقستاندى سىرتقى نارىقتا تانىتۋعا باعىتتالعان كلاسسيكالىق, بٸراق ەلٸ دە ماڭىزدى قۇرال.
مينيسترلٸك الداعى كەزەڭدە قىتاي نارىعىندا ارنايى ماركەتينگتٸك جوبالاردى ٸسكە اسىرۋدى جەنە وڭتٷستٸك كورەيانىڭ ٸرٸ ونلاين تۋريستٸك پلاتفورماسى – Hana Tour-پەن ىنتىماقتاستىقتى كەڭەيتۋدٸ جوسپارلاپ وتىر. بۇل قادامدار قازاقستاندى ازييا تۋريستٸك كارتاسىندا بەلسەندٸرەك كٶرسەتۋگە باعىتتالعان.
دەگەنمەن نەگٸزگٸ سۇراق اشىق كٷيٸندە قالادى: 19 ميلليون قارالىم ناقتى تۋريست اعىنىنا قانشالىقتى اينالادى? ٶيتكەنٸ تسيفرلىق ەسەر مەن شىنايى تۋريستٸك اعىم – بٸر-بٸرٸنە تەڭ ۇعىم ەمەس.
