Búgingi tańda el aýmaǵyndaǵy qoqys poligondarynda 100 million tonnadan astam qatty qaldyqtar kómilipti. Oǵan jyl saiyn 6 million tonna qosylyp otyratynyn eskersek, kóp uzamai bul kórsetkish eselenip ósip keteri anyq. Iaǵni, mamandardyń qaldyqtardan taý turǵyzýǵa bolatynyn aityp dabyl qaǵyp jatqany beker emes syńaily.
Elordada jańǵyrmaly energiia jáne qaldyqtardy qaita óńdeý máselelerine arnalǵan alqaly jiyn ótýde. EKSPO-2017 halyqaralyq kórmesiniń qarsańynda «Green Energy & Waste Recycling Forum-2016» degen atpen ótip jatqan biznes-forýmdy uiymdastyrýǵa «Astana EKSPO-2017» Ulttyq kompaniiasy, Energetika ministrligi jáne «Atameken» Ulttyq kásipkerler palatasy muryndyq bolypty. Osy biznes-forýmda mamandar qoqysty óńdeýge qatysty Qazaqstanda qoldanylyp kele jatqan tájiribeni odan ári jetildirýdiń joldaryn qarastyrdy.
Energetika ministrligi Qaldyqtardy basqarý departamentiniń direktory Jan Nurbekov atap ótkendei, elimizde jańǵyrmaly energiiany damytý, jańa energiia kózderine qol jetkizý, qaldyqtardy energiia óndirýge paidalaný biznestiń de damýyna yqpal etetin mańyzdy baǵyttardyń biri bolyp tabylady. Ekologiialyq jaǵynan tazalyǵyn eskersek, onyń mańyzdylyǵy da arta túsetini túsinikti.
Taǵy bir aita keterligi, biylǵy jyldyń ekinshi jartysynda qorshaǵan ortany qorǵaý týraly zańnamalarǵa engizilgen ózgerister kúshine engen bolatyn. «Qazaqstannyń turaqty damýyna kómektesý» ortalyǵynyń direktory Vera Mustafinanyń aitýynsha, bul ózgeristen kópshilik beihabar.
– Zańǵa engizilgen ózgeristerde keibir qaldyq túrleri, atap aitqanda elektrondy qurylǵylar, ýly zattar syndy qyldyqtardy qalai qoldaný kerektigi kórsetilgen. Ókinishke qarai, ol týraly qarapaiym azamattar da, óndiristik kásiporyndar da bile bermeidi. Búgingi jiynǵa kóptegen kásiporyndardyń ókilderi qatysyp jatqanyn eskerip, zańda kórsetilgen jańa erejeler, talaptar týraly aitylýǵa tiis, – deidi ol.
Eki kúnge sozylatyn biznes-forýmda álemde jáne TMD elderinde, Qazaqstanda jańǵyrmaly energiianyń damý barysy, qatty turmystyq qaldyqtardy jinaý, suryptaý jáne kádege jaratý jumystary, óndiristik qaldyqtardy óńdeý jáne basqa da taqyryptar boiynsha seminarlar men dóńgelek ústelder ótkiziledi. Sondai-aq, qaldyqtardan energiia óndirý boiynsha túrli jobalar tanystyrylady.
Arnur ASQAR,
«Egemen Qazaqstan»
.jpeg)