Ótken jumada Mysyrdyń Sinai túbeginde ornalasqan meshitke jasalǵan jan túrshigerlik shabýyldy aldyn ala tergep-tekserý oǵan DAISh lańkestik tobynyń qatysy baryn rastaidy. Bul jaily Mysyr kúshtik qurylymdaryndaǵy derekkózderge silteme jasap TASS habarlaidy.
«Aldyn ala tergep-tekserý shabýyldyń DAISh lańkesteri tarapynan bolǵanyn rastaidy», - delingen habarlamada.
Juma kúni Soltústik Sinai provintsiiasynyń astanasy ál-Arish qalasyna (Gaza sektorynan 30 km jerde ornalasqan) qarasty Bir-ál-Ábd eldi mekenindegi ár-Raýda meshitinde juma namaz kezinde jan túrshigerlik terakt boldy. 30-ǵa jýyq lańkes jarylǵysh zatty qulshylyq etip jatqan adamdardyń ortasyna laqtyryp, jaryp jibergen. Artynsha meshitten qashyp shyqpaq bolǵandarǵa qarai oq jaýdyrǵan. Terakt saldarynan 305-ten astam adam, sonyń ishinde 27 bala qaza taýyp, 128 adam jaralandy.
Teraktini resmi túrde eshkim moinyna almaǵanmen, Mysyr tarapy shabýyldy DAISh-ke adal bolýǵa ant-sý ishken «Ánsar Beit ál-Maqdis» («Ierýsalim jaqtastary») lańkestik toby uiymdastyrǵanyna kúmán keltirmeidi. Atalǵan lańkestik top qazirgi kezde óz atyn «Vilaiet Sinai» («Sinai provintsiiasy») dep ózgertip alǵan. Mysyrda sońǵy jyldary uiymdastyrylǵan kóptegen lańkestik shabýyldarǵa dál osy toptyń qatysy bar.
