QR Memlekettik qyzmet isteri jáne sybailas jemqorlyqqa qarsy is-qimyl agenttigi temirjol stansalarynyń basshylaryn ustaý kezindegi videony jariialady, dep xabarlaidy QazAqparat tilshisi.
Sybailas jemqorlyqqa qarsy is-qimyl ulttyq biýrosy tóraǵasynyń orynbasary Shyńǵys Qabdollanyń aitýynsha, temirjol qatynasy salasyndaǵy jemqorlyq áreketter júieli túrde qaitalanady. Sheneýnikter de, basqa basshylar da óz qyzmetterin asyra paidalanyp jatady.
«Máselen, osy aptada «Qazaqstan temirjoly» AQ-syna qarasty Qostanai joldary bólimshesi filialynyń direktory, onyń orynbasary jáne stantsiia basshysy ustaldy. Olar kásipkerden jalpy somasy 6,1 million teńge kóleminde para alǵan. Sol úshin taýarlardy tasymaldaýǵa qajetti vagondardy kedergisiz berýge ýáde etken», - dedi Sh.Qabdolla Astanada ótken baspasóz máslixatynda.
Onyń aitýynsha, Almaty oblysynda Býrýndai stantsiiasynyń basshysy da para alǵany úshin kúdikke ilinip otyr. Ol vagon usynǵany úshin kásipkerden 100 myń teńge talap etken.
Aita ketken jón, sońǵy úsh jyldyń ishinde temirjol tasymaly salasynda 70 jemqorlyq áreketi anyqtaldy. Sol úshin 33 laýazymdy tulǵa qylmystyq jaýapqa tartyldy, olardyń ishinde 28 adam sottaldy.
«Temirjol qatynasy salasyndaǵy jemqorlyq áreketteri jumysqa qabyldaýdan bastap memlekettik satyp alýlar, jolaýshylar men júk tasymalyna deiin taralyp ketken. Basshylar da, jolserikter de jaýapqa tartylady», - dep atap kórsetti Sh.Qabdolla.
