Temirtaýda fýtzal týrnirindegi jappai tóbelesten keiin qylmystyq is qozǵaldy. Tóbeleske qatysýshylardyń barlyǵy politsiiaǵa jetkizildi, - dep habarlaidy Tengrinews.kz tilshisi.
Qaraǵandy oblystyq PD baspasóz qyzmeti fýtzaldan ótken týrnirde bolǵan jappai tóbelestiń jai-japsaryn habarlady. Belgili bolǵandai, Naýryz merekesine arnalǵan jarys 21 naýryz kúni Temirtaýdaǵy sport keshenderiniń birinde uiymdastyrylǵan.
"Politsiia qyzmetkerleri sotqa deiingi tergeý barysynda tóbeleske qatysýshylardyń barlyǵyn anyqtady. Týrnir áýesqoi fýtzal komandalary arasynda uiymdastyrylǵany belgili boldy. Eki komanda arasyndaǵy oiyn kezinde sportshylardyń biri ereje buzyp, qarsylas komandanyń sportshysyn iterip jibergen. Osydan keiin komandalastaryn jaqtaǵan eki komanda músheleri arasynda tóbeles shyǵa bastaǵan", - dep habarlady Qaraǵandy oblysy PD baspasóz qyzmeti.
"Politseiler QR Qylmystyq kodeksiniń 293-babynyń 2-bóligimen "Bir top adamdar jasaǵan buzaqylyq" boiynsha qylmystyq is qozǵady. Tóbeleske qatysýshylardyń barlyǵyna qatysty sot-meditsinalyq saraptama taǵaiyndaý týraly qaýlylar shyǵaryldy. Tergeý amaldary júrgizilip jatyr", - dedi PD.
Eske salaiyq, buǵan deiin Temirtaýda fýtzaldan eki komanda – "Imstalkon" men "Aq jol" oiynshylary tóbeleskeni habarlanǵan bolatyn. Áleýmettik jelide tóbelestiń videosy tarap ketti. Oqiǵa Naýryz meiramyn toilaýǵa arnalǵan týrnirde bolǵan. Jankúierler de oiynshylarǵa qosylyp tóbeleske qatysqan.
