25 mamyr - M.Áýezov atyndaǵy Qazaq memlekettik akademiialyq drama teatrynyń mýzeiiniń qurylǵan kúni. Sondai-aq, teatr mýzeiine mereili 50 jyl tolyp otyr. Bul ataýly kúnge orai M.Áýezov teatrynyń ujymy «Teatr mýzeiiniń túni» sharasyn uiymdastyrdy.
Teatr mýzeii jarty ǵasyr ýaqyt ishinde óziniń jádigerlerin tolyqtyrýdan bólek, halyqty teatrdyń ótkenimen tanystyratyn, aiaýly da ardaqty akterlerdiń ómirnamasynyń el bile bermeitin betterin jinaqtap, kórermenge jetkizetin airyqsha bedelge ie bola bildi.
Shara barysynda teatrymyzdyń akterlary qoiylymnan úzindiler keltirip, ónerlerin kórsetip, teatr mýzeii túnin tamashalaýǵa kelgen kórermenderdi tamsandyryp, sharanyń kórkin asha tústi. Qazaqstannyń eńbek sińirgen qairatkeri, teatrymyzdyń direktory Ashat Maemirov pen «Mýzei» bóliminiń jetekshisi Nargiz Tamabekqyzynyń alǵy sózinen keiin kórmeni kórermederge tanystyrý bastaldy. Mýzei kórmesiniń ekinshi bólimine alpysynshy jyldardan joǵary, táýelsizdikke deiingi kezeńdi arqaý etken dúnieler qoiylǵan. Bul jádigerler men tarihi sýretterdi abyz akter KSRO Halyq artisi Asanáli Áshimov ózi bastap tanystyryp, odan keiin Qazaqstannyń halyq artisteri Sábit Orazbaev, Esmuhan Obaev jáne taǵy basqa teatrdyń aǵa býyn ókilderi jalǵastyrdy.
- Bul teatr mýzei túnin ótkizý týraly oi bizge, Eýropa keńistiginde kóp bolamyn. Ol jaqta mýzei túnderin ótkizý jaqsy uiymdastyrylady. Koroldik Shekspir teatrynda, Máskeýdegi M.Ermolova teatrlarynda osyndai mádeniet bar. Eýropa teatrlarynda 200 jyl burynǵy kostiýmder saqtalǵan. «Asaýǵa - tusaý» qoiylymynda ataqty Sháken Aimanov pen Hadisha Bókeevanyń qatysýymen shetelderge áigili bolǵan elimizdiń ulttyq sahnagerleri. Teatr ónerinde mynadai uǵym bar. Áigili adamdardyń sahnadaǵy kostiýmderiniń árqaisysynda kie bar degen. Sol kiimdegi kie, ónerleri darysa eken dep, biz jas akterlarlymyzǵa juǵysty bolsyn dep kigizip jatamyz. Mysaly, teatrymyzdyń aktrisasy Gúlnur Shyńǵysovanyń kiip turǵan kostiými ataqty KSRO halyq artisi Farida Sharipovanyń rolderiniń ishindegi shoqtyǵy biik «Qara Qypshaq Qoblandy» dramasyndaǵy «Qarlyǵa» rolin somdaǵanda kigen kostiými. Olardyń tutynǵan rekvizit zattary, sýretteri, tipti dápter, kúndelikterine deiin barlyǵy saqtaýly tur. Arhivtik materialdardy saqtaýǵa arnalǵan arnaiy bólme bar. Sondyqtanda biz maqtana alamyz. Qazaqstanda birden bir erekshe mýzei bar ol – M.Áýezov teatrynyń mýzeii dep. Endi bolashaqta ózimizdiń teatr mýzeii bolyp qurylyp jatsa, nur ústine nur bolady, -deidi teatrymyzdyń direktory Qazaqstannyń eńbek sińirgen qairatkeri Ashat Maemirov.
Jádigerlerdi saqtaý úshin teatrda arnaiy mýzei mamandary qyzmet etedi. Olar jyl saiyn gazet qiyndylaryna deiin birneshe jyldyq barlyq suqbattardy, bárin saqtaidy. Mýzeidegi bul kostiýmder qazirgi qoiylymdarǵa qoldanylmaidy eken. Elimizdiń tarihyn, qazaq teatryn ashqan abyzdarymyz, teatrymyzdyń alǵashqy qarlyǵashtary osyndai kostiýmda bolǵanyn jas býynǵa kórsetip, kórnekilik quraldarymen de, dáriptei bilgendi jón sanaidy.
Búginde mýzei qory Qazaqstandaǵy ózge teatrlardan kósh ilgeri, mundaǵy zattardyń san alýandyǵy, tarihi quny asa joǵary baǵaly dúnielerdiń moldyǵy kóńilge medeý. Sol jyldary Qapan Badyrov, Nurmuhan Jantórin, Sábira Maiqanova, Sháken Aimanov, Hadisha Bókeeva, Sholpan Jandarbekova, Asanáli Áshimov, Esmuqan Obaev, Áýbákir Rahimov bastaǵan aǵa-apalarymyz bar kúshin salyp, jádigerlerdiń jinaqtalýyna, kóbeiýine, olardyń hronologiialyq tártippen rettelýine zor úles qosqan.
Teatr direktory Ashat Maemirov teatr mýzeiine jádigerlerlerdi jinaqtap, kóziniń qarashyǵyndai saqtap mýzei jumysyna úlesin qosqany úshin Zeinesh Moldabaiqyzyna teatr ujymynyń atynan quttyqtap, alǵys hat tabys etti.
Sondai-aq M.Áýezov teatrynda ómiriniń sońyna deiin, shirek ǵasyrdai qyzmet etip, úlkendi-kishili qyryqtan asa rolderdi somdaǵan, óz kásibine adal, daryndy aktrisa Raýshan Áýezbaevanyń qyzy bul sharaǵa arnaiy kelip, ujymdy búgingi teatr mýzeiiniń kúnimen quttyqtap, teatr direktory Ashat Maksimulyna estelik syilyq tabys etti.
Shara sońynda teatr mýzeiiniń 50 jyldyǵyna arnaiy shaqyrylǵan qurmetti qonaqtar ózderiniń estelik qoltańba jazbalaryn qaldyryp, sýretke tústi.
Ádilǵazy Baqytuly
