Qazaqstan Táýelsizdiginiń 30 jyldyǵyna orai qalanyń ortalyq joldarynyń boiynda ornalasqan 10 turǵyn úidiń qabyrǵasyna mýral salynady, dep habarlaidy "Ult aqparat".
Bul týraly qoǵamdyq kommýnikatsiia ortalyǵynda ótken brifingte Aqtaý qalasynyń ákimi Nurdáýlet Qilybai málim etti.
Shahar basshysynyń aitýynsha, joba qurylysy mekemeleriniń demeýshiligimen iske asady. Alǵashqy jumystar 10 mamyr kúni bastalady.
Budan bólek, el Táýelsizdiginiń mereili merekesin toilaý maqsatynda birneshe joba iske aspaq.
«Jańa 40 shaǵyn aýdannan saiabaqtyń irge tasy qalanyp, qurylys jumystary bastalyp ketti. Demeýshiler qarajaty esebinen Aqtaý qalasynyń «Shyǵys-3» shaǵyn aýdany, № 8 jáne № 9 ónerkásiptik aimaqtyń qiylysyna «Shotan batyr» eskertkishin ornatý jáne «Aqtaý-Áýejai» tas jolynyń boiyna kire-beris kesheniniń qurylysyn salý jobalary ázirlendi. Al, 20-sy shaǵynaýdaǵy ainalmaly jolǵa demeýshilik esebinen Táýelsizdiktiń 30 jyldyǵyna orai Aqtaý qalasyna syi retinde «Saltanatty arkanyń» qurylysy bastaldy», - dedi Nurdáýlet Qilybai.
Qala ákiminiń aitýynsha, Aqtaýda 17 jáne 39 shaǵyn aýdandarda jańa meshitterdiń qurylysy boi kóterdi.
Qazir 17 shaǵynaýdan Beket ata meshiti ǵimaratynyń súrý jumystary júrgizilip jatyr.
Ornyna 1200 sharshy metr bolatyn jańa meshit turǵyzylmaq. Jańa meshit 2021 jyldyń II toqsanynda paidalanýǵa beriledi dep kútilip otyr.
Al 39 shaǵynaýdandaǵy 500 adamǵa arnalǵan «Erjan Haziret» meshitiniń qurylysy 2021 jyldyń sońyna deiin aiaqtalýy tiis.
«El Táýelsizdiginiń 30 jyldyǵyna orai 17 shaǵynaýdanda 3 qabatty «Oqýshylar saraiy» salynady. 6540 sharshy metrdi quraityn ǵimaratqa 1000-nan astam bala qabyldanatyn bolady», - dedi Nurdáýlet Qilybai.
