«Esildiń boiy en jailaý, jaǵalai qonǵan el qandai» demekshi, 36 ulttyń yntymaǵyn uiystyryp otyrǵan Esil aýdanynyń 2550 turǵyny elimizdiń basty merekesin aitýly tabystarmen qarsy alǵany qýanyshty.
Tarihymyzǵa «Tyń qaqpasy» retinde jazylǵan óńirde 8000 sharshy kilometr egistik alqap bar. Biylǵy altyn dán kerýenderi salmaqty bolyp, qyzyl qyrman berekesin beldeýden tókti. Óńirdiń peizajdyq ponaramasyn árlep turǵan eńseli elevatorlarda eseli eńbek qyzǵan shaq. Ústimizdegi jyly «Altyn dán», «QazBrend» JShS taǵy da eki astyq qoimasyn qatarǵa qosýy jergilikti diqandardyń bereke jolynyń biiktigin kórsetedi.
Malshylar qaýymy da ekpindi istiń jeteginde. Olar memlekettik qoldaýdyń keń júiesin paidalanýǵa yntaly. Máselen, «Sybaǵa», «Qulan», «Altyn asyq» baǵdarlamasymen biyl 310 million teńgege 400 bas iri qara satyp alynypty. Al qurylys jumystarynyń aýqymy 2014 jylǵy kórsetkishten 1,5 ese asyp tússe, ónerkásip salasynyń 86,3 paiyzy qaita óńdeý kásiporyndarynyń enshisinde eken.
«Táýelsizdik poiyzyn» jaqsylyqtar men jetistikter simvoly dep baǵalaityn esildikterdiń delegatsiia quramymen abyroimen qaýyshýynyń syry osynda dep bilemiz. Qalaiy kilem, qyrmyzy gúl shoqtarymen, nan-tuz, shashýmen qarsy alynǵan qonaqtarǵa aýdan ákimi Amanbek Qaljanov «Hosh keldińizder» tilegin aitty. Aýdan ardagerleri, óndiris jetekshileri, jastar uiymdarynyń belsendileri Kók týymyzdy asqaq jelbiretýde. Anadai jerde balalar úiiniń aimaqqa aty málim úrlemeli aspaptar orkestri qurmet qanatyn qalyqtatyp tur.
Jarty aiǵa jýyq el aralap, jurtshylyqqa jaqsy tanys bolyp qalǵan poiyz shtabynyń basshysy Ámirjan Álpeiisov vokzal alańyn jańǵyrtyp, Táýelsizdik tolǵamyn tógiltti. Sózin «bizge júktelgen jaýapkershilik mol» dep aiaqtaǵan resmi qonaq «jumysqa kiriseiikti» ańǵartty. Shynynda, Arqanyń shyńyltyr aiazyna qaramastan, jumys qaýyrt júrgizildi. Birinshi toptaǵy 21 maman aýdandyq ortalyq aýrýhanada, balalar men áielder keńesi ortalyǵynda jáne emhanalarda kúni boiy 200-den astam adamdy qabyldap, kóńildegi kúpti oilaryn seiilte bildi.
«Nur Otan» partiiasy aýdandyq filialynyń ǵimaratynda poiyz múshelerimen qatar, jergilikti qoǵamdyq kelisim keńesiniń ókilderi jurtshylyqty jeke máseleleri boiynsha qabyldady. Bul sharaǵa aýdan ákimi A.Qaljanov, apparat bólimderiniń basshylary qatysýy anyq aqparat alýǵa jáne máseleniń jedel qaralýyna yqpal etti. Qabyldaýǵa kelgen 8 kisiniń barlyǵy da jaýaptarǵa qanaǵattanǵandyq bildirse, eki adamnyń turǵyn úi-kommýnaldyq jaǵdaidy jaqsartýǵa qatysty tilegi qolma-qol sheshildi.
Densaýlyq saqtaý jáne áleýmettik damý ministrliginiń mamandaryna júginýshiler negizinen zeinetaqy taǵaiyndaý, áleýmettik kómektiń sipaty týraly suraqtar qoidy. Qabyldaýǵa jazylǵan 16 adamǵa tiisti keńester berilip, arnaiy daiyndalǵan aqparattyq kitapshalar taratyldy. Quqyqtyq máseleler boiynsha alty adamnyń suraǵy qanaǵattandyrylsa, biznes ókilderiniń, aýyl sharýalarynyń múddesi men quqyqtaryn qorǵaý jóninde 50 kisige jan-jaqty keńester berildi.
Tústen keiin Bilim jáne ǵylym ministrliginiń, Qazaqstan halqy Assambleiasynyń ókilderi aýdannyń pedagogtyq ujymymen, mektep túlekterimen jáne jalpy jurtshylyqpen keńeitilgen májilis qurdy. Respýblikalyq Assamb-
leia atynan aýdandyq kitaphanaǵa ár túrli taqyryptaǵy baspa ónimderi syiǵa tartyldy.
Esil balalar úiindegi kezdesý áserliligimen este qaldy. Qoǵam qairatkeri Arystan Jumaǵali tárbielenýshiler qolymen jasalǵan buiymdardy ainalymǵa shyǵarý úshin internet-dúken ashý týraly usynys jasady. Astanadan kelgen qonaq balalardyń jeke qarjylai salymyn tolyqtyrý úshin 15 000 tegeni Aleksandr Felehinniń «Turǵyn úi jinaq bankindegi» esebine aýdardy.
Shaǵyn qaladaǵy №7 Agrotehnikalyq kolledjde 260 adam qatysqan kezdesý boldy. Shara baǵdarlamasy sheńberinde «Táýelsiz Qazaqstan» poiyzynyń músheleri el damýynyń 25 jyldyǵyndaǵy irgeli ózgerister, ishki-syrtqy saiasat, Elbasynyń «Máńgilik El» jobasy týraly tartymdy áńgime qozǵalyp, stýdentterdiń shyǵarmashylyq eńbekteri sarapqa salyndy. Qonaqtar kolledjdiń materialdyq-tehnikalyq jabdyqtalýymen tanysyp, kórkemónerpazdar kontsertin tamashalady.
Memlekettik «Balapan» baǵdarlamasymen paidalanýǵa berilgen «Bolashaq» balalar baqshasyndaǵy, «100 mektep, 100 aýrýhana» baǵdarlamasymen salynǵan №3 orta mektebindegi, «Nurly jol» baǵdarlamasymen salynyp jatqan qazandyq kesheniniń qurylysyndaǵy igi ister de Táýelsizdik merekesi ókilderiniń nazarynan tys qalmady.
Keshkisin Mádeniet saraiynda qonaqtarǵa arnap merekelik kontsert qoiyldy.
Esildikter «Táýelsiz Qazaqstan» poiyzyn Arqalyq qalasyna sán-saltanatpen shyǵaryp saldy.
Baqbergen AMALBEK,
«Egemen Qazaqstan»
Aqmola oblysy,
Esil aýdany
.jpeg)