14 shilde kúni taýda joǵalyp ketken 7 jasar Ernur Sádýaqas áli tabylǵan joq. Qutqarýshylar balany Qyrǵyzstan shekarasyna deiingi aýmaqtan izdestirip jatyr, dep habarlaidy QazAqparat tilshisi.
«Ázirge nátije joq. Búgin qutqarýshylar eki baǵytqa bólindi. Balany izdeý aimaǵy 25 shaqyrymǵa keńeiedi. Qutqarýshy toptyń bireýi batysqa qarai, ekinshisi shyǵys jaq aýmaqty izdeidi. Sondai-aq, izdeý sharalaryna oblys ákimdiginiń ókilderi men 2 depýtat qosyldy. 15 adam atqa qonyp, 40 politsei, ákimdiktiń 6 qyzmetkeri belgilengen aimaqta syzba boiynsha izdeý jumystaryn júrgizedi. Iis sezgish itterdi jetektegen top jyra, shatqaldardy aralaýda. Qutqarýshy toptyń bir bóligi Qyrǵyzstan shekarasyna deiin sozylǵan aýmaqty tekserýge shyqty», - dedi Almaty oblysy IID baspasóz qyzmetiniń basshysy Sergei Neznaev.
Eske sala ketsek, Almaty oblysynyń Jambyl aýdanynda joǵalyp ketken balany qutqarýshylar 14 shildeden beri izdestirýde.
2011 jyly týǵan Ernur Sádýaqas Yntymaq aýylynan ońtústik qaptaldaǵy «Kishi saz» jaiylymyna bara jatqan jolda taýly aýmaqta joǵalǵan.
7 jastaǵy Ernurmen birge úlkendi-kishili 5 bala jolǵa shyqqan. Qazir balalardyń barlyǵy aýylda. Tek Ernur ǵana oralmady.
