Qazaqstan Prezidenti Qasym-Jomart Toqaev belgili akter ári rejisser, Qazaqstannyń halyq artisi Doshan Joljaqsynovty 75 jasqa tolǵan mereitoiymen quttyqtady, dep habarlaidy ult.kz.
Memleket basshysynyń quttyqtaýyn óner iesine Almaty qalasynyń ákimi Darhan Satybaldy jetkizdi.
Prezident quttyqtaý hatynda Doshan Joljaqsynovtyń qazaq ónerin damytýǵa sińirgen eńbegin erekshe atap ótip, onyń ulttyq mádeniet pen rýhaniiatqa qosqan úlesine joǵary baǵa berdi.
“Siz saliqaly ǵumyryńyzdy ult rýhaniiatyn ulyqtaýǵa arnap, úzdiksiz shyǵarmashylyq izdenisterińiz arqyly zor jetistikke qol jetkizdińiz. Dástúr sabaqtastyǵyn saqtap, izbasar shákirtterińizdi tárbielep kelesiz”, – delingen Prezident quttyqtaýynda.
Doshan Joljaqsynov sanaly ǵumyryn teatr men kino ónerine arnap, shyǵarmashylyq jolynda ondaǵan este qalarlyq obrazdy somdaǵan. Ol akterlik sheberligimen kórermenniń ystyq yqylasyna bólenip qana qoimai, rejisser retinde de otandyq kinematografiianyń damýyna eleýli úles qosty.
Aita keteiik, Talǵat Jorabaevtyń basy daýǵa qaldy.
Doshan Joljaqsynov kim?
Doshan Qaliuly Joljaqsynov – Qazaqstannyń halyq ártisi, belgili teatr jáne kino akteri, rejisser, stsenarist ári ánshi. Ol 1951 jyly 7 qazanda Shyǵys Qazaqstan oblysynyń Kúrshim aýdanynda dúniege kelgen. 2026 jyly óner iesi 75 jasqa toldy.
1973 jyly Almaty memlekettik óner institýtyn támamdaǵan. Shyǵarmashylyq jolyn Ǵabit Músirepov atyndaǵy balalar men jasóspirimder teatrynda bastap, keiin osy óner ordasynyń direktory ári kórkemdik jetekshisi qyzmetin atqarǵan. Teatr sahnasy men kinoda 200-den astam obraz somdaǵan.
Doshan Joljaqsynov “Gaýhartas”, “Daladaǵy qýǵyn”, “Altyn kúz”, “Ompa”, “Kóshpendiler” jáne basqa da tanymal filmderge túsken. Ásirese “Birjan sal” jáne “Qunanbai” tarihi filmderi arqyly keńinen tanyldy. Atalǵan eki týyndynyń rejisseri bolyp, basty keiipkerlerdi ózi somdady.
Ónerdegi eńbegi úshin Qazaqstannyń halyq ártisi ataǵyna ie bolyp, Memlekettik syilyqpen marapattalǵan. 2021 jyly 70 jasqa tolýyna orai “Otan” ordenin aldy.
Doshan Joljaqsynov akterlik jáne rejisserlik qyzmetimen qatar qazaqtyń halyq ánderin oryndaýshy retinde de tanylǵan. Ol ulttyq teatr men kino óneriniń damýyna eleýli úles qosqan óner qairatkerleriniń biri.
