Isi qazaqqa tanymal Imanǵali Tasmaǵambetovtyń Astana qalasyna ákim bolyp taǵaiyndalǵanyna ekinshi jyl bolatyn. Men ol kezde elordanyń irgesindegi «Prigorodnyi» kentinde turatyn edim. «Qala ákimi halyqqa jyl saiynǵy esebin jasaidy» eken degen habardy esti sala sol kezdegi «Kongrres holl» saraiyna el-jurtpen birge men de bardym.
Imanǵali Nurǵaliuly aldymen elordanyń áleýmettik-ekonomikalyq ahýaly men alda atqarylatyn jumystar jaiynda jan-jaqty baiandapótti. Al, odan keiin jinalǵan halyq tarapynan qoiylǵan suraqtarǵa jaýap berdi. Sol suraq qoiǵan kisilerdiń arasynda men turatyn «Prigorodnyi» kentiniń bir turǵyny da boldy. Ol qala ákimine atalmysh kenttegi kóshe men turǵyn úiler irgesindegi julym-julymy shyqqan aǵashtar jaiyn qozǵady. Astana astana bolǵaly eshqandai kútim kórmegen ondaǵy keibir aǵashtar adam ómirine qaýip tóndirip turǵanyn da ádemi jetkizdi. Onyń bul oryndy kótergen máselesin muqiiat tyńdaǵan Imekeń zalda otyrǵan bir orynbasaryn ornynan turǵyzdy da «Myna máseleni dereý sheshińder» dep tapsyrma berdi.
Óz basym, bul jinalystyń sońyna deiin bola almadym. Ózim turatyn kent jaqta jeke sharýam shyǵyp qaldy da, sol jaqqa qarai jol tarttym. Endigi qyzyqty qarańyz, jol boiynda «Prigorodnyi» kentine qarai kósh túzegen qalanyń kógaldandyrý basqarmasynyń birneshe kóligin kózim shalyp qaldy. Onda kóliktiń neshe túri bar, tipti joǵaryǵa kóteretin satysy bar «Kranǵa» deiin. Buǵan jumysshylar jaiǵasqan eki-úsh júk kóligin de qosyńyz. Ne kerek, bulardyń «bes qarýy túgel». Olar dittegen jerine jete salysymen kent ishindegi aǵashtardy otaýǵa bel sheshe kirisip ketti. Nesin jasyraiyn, men jeke sharýamdy jiyp qoiyp, álgi jumysshylardyń áreketin kóp ýaqyt tamashalap turdym. Tasmaǵambetovtyń bergen tapsyrmasynyń izbe-iz oryndalyp jatqanyna qatty tań qaldym hám tamsandym. Ózderińiz oilap qarańyzdarshy, tapsyrma jinalys kezinde berildi. Sol berilgen tapsyrma jinalys júrip jatqan ýaqytta júzege asyp jatyr. Mine, naǵyz istiń adamy dep osy kisini aitýǵa bolady. Sózi men isi tarazy basyn teńestirip tur. Muny bir deńiz.
Ekinshi, bizdiń kenttegi jumys munymen bitken joq. Toz-tozy shyqqan kósheleri túzeldi. Turǵyn úilerdiń barlyq aýlasyna kúrdeli jóndeý jumystary júrgizildi. Qysqasy, bir jyldyń ishinde kent kelbeti adam tanymastai ózgerdi. Shaǵyn sulý kentke ainalyp shyǵa keldi. Eger senbeseńiz men sóz etken kentke arnaiy baryp, bir serýendep kórińizshi. Sondaǵy jergilikti turǵyndardan kenttiń keshegisi men búginin suraýdy da umytpańyz. Tasmaǵambetovtyń kezinde qyrýar tirlik jasalǵanyn jyr qylyp aityp beretinine tittei de kúmánim joq.
Erlibai Ózbekbaiulynyń feisbýktegi jazbasynan
