QR Premer-Ministriniń orynbasary Imanǵali Tasmaǵambetovtiń tóraǵalyǵymen «EKSPO-2017» Halyqaralyq mamandandyrylǵan kórmesi aiasynda mádeni baǵdarlamany sapaly daiyndaý jáne ótkizý máseleleri jóninde keńes ótti. Bul týraly QR Premer-ministri orynbasarynyń sekretariaty habarlaidy.
Osydan buryn berilgen tapsyrmaǵa sáikes, Mádeniet jáne sport ministrligi, Astana qalasynyń ákimdigi jáne «Astana EKSPO-2017» UK» AQ birlesip kórme ótetin kezeńdegi mádeni baǵdarlamany joǵary deńgeide uiymdastyrý máseleleri jónindegi úilesimdi jumysty kúsheitti. Sonymen qatar, delegattar men qonaqtardyń kelýi boiynsha uiymdastyrýshylyq suraqtar jiti baqylaýǵa alyndy.
Osyǵan orai, keńes barysynda vitse-premer Astana qalasynyń ákimdigi elordanyń injenerlik-kóliktik infraqurylymyn egjei-tegjeili zerdeleý qajet ekenine toqtaldy. Tarqatyp aitsaq, joldaǵy júktemeni azaitý maqsatynda kólik aǵymyn modeldeý boiynsha qolaily nusqalardy esepteý, qonaqtardyń kelýi jáne olardyń qaýipsiz ornalasýy boiynsha uiymdastyrýshylyq suraqtardy pysyqtaý, qonaq úi jáne basqa da mindetterge jumylýy úshin ótetin sharalardy barynsha qysqartýǵa basymdyq berdi. Sondai-aq, Qazaqstannyń mádeniet pen sporttaǵy jetistikterin tanytý maqsatynda sheteldik jobalardy azaitý jáne ulttyq brendti nasihattaý qajettigi aityldy.
«Eń mańyzdysy, biz mindetti túrde turǵyndardyń áleýmettik az qamtylǵan tobyna tegin bilet taratý máselesin pysyqtaýymyz qajet. Olar osynaý aýqymdy sharaǵa daiyndalǵan kólemdi ári qyzyqty repertýardy tikelei ózderi tamashalap, kórý múmkindigine ie bolýy tiis. Mine, osy suraqty erekshe baqylaýǵa alýymyz shart. Ásirese, bul qalanyń jáne mádeniet ministrliginiń aiasynda ótetin sharalarda eskerilýi kerek», — dedi QR Premer-Ministriniń orynbasary Imanǵali Tasmaǵambetov.
Búgingi tańda QR Mádeniet jáne sport ministrligi Astana qalasy ákimdigimen jáne «Astana EKSPO-2017» UK» aktsionerlik qoǵamymen birlesip mádeni-tanymdyq jáne sporttyq sharalardyń keshendi baǵdarlamasyn bekitti. Atap aitqanda, qazaqtyń dástúrli ónerin kórsetý, teatrlyq-buqaralyq sharalar, halyqaralyq jobalar, kórmeler, sporttyq jáne aǵartýshylyq-taqyryptyq sharalar.
Sonymen qatar, osy baǵyttaǵy barlyq qurylymdardy tiianaqty úilestirý úshin shtab quryldy. Ol Astana qalasy ákimdiginiń konveshn biýrosy jáne «Astana EKSPO-2017» UK» aktsionerlik qoǵamy shtabymen tyǵyz bailanysta bolady.
Aita keteiik, «EKSPO-2017» Halyqaralyq mamandandyrylǵan kórmesi aiasynda demeýshilik qarajat esebinen La Skala teatrynyń gastrolin, «Qytai imperatory Tsin Shi Hýandidiń terrakottan jasalǵan áskeri mádeni eskertkishiniń» kórmesin, Marindik teatrynyń gastrolin, «Plasido Domingo operaliiasy» Halyqaralyq jas vokalister baiqaýynyń finalyn ótkizý, sondai-aq, Ejelgi Egipettiń arheologiialyq jádigerleri kórmesin uiymdastyrý josparlanǵan.
