Búgin Qazaqstan Respýblikasy Premer-ministriniń orynbasary Imanǵali Tasmaǵambetovtiń tóraǵalyǵymen Alashorda qozǵalysynyń qurylǵanyna 100 jyl tolýyna orai Alash ziialylarynyń shyǵarmashylyq muralaryn zerdeleý jáne ony jandandyrý máseleleri boiynsha keńes ótti.
Alash qozǵalysynyń táýelsizdik murattary úshin kúrestegi róli men mańyzyn, onyń kóshbasshylarynyń saiasi-quqyqtyq, ulttyq qundylyqtarǵa qatysty kózqarastaryn, tujyrymdaryn jańa zamannyń talaptaryna sai zerdeleý óte mańyzdy.
QR Premer-ministriniń orynbasary Imanǵali Tasmaǵambetov: «HH ǵasyrdyń basynda ulttyń ziialylary azattyq úshin bolǵan kóp ǵasyrlyq kúreste mańyzdy ról atqardy. «Alash» alǵashqy saiasi partiiasy jáne Alash Orda úkimetiniń paida bolýy azamattyq kemeldengen jáne halyqtyń bolashaq taǵdyryn sheshe alatyn qazaqtyń saiasi ziialylarynyń joǵarǵy áleýetin kórsetti», - dep atap ótti.
Bul oraida, vitse-premer elimizdegi Alashtanýshy tarihshylar men ádebietshiler, otandyq kino jáne televiziia salasynyń mamandarymen birlese otyryp, tyń bastamalardy – kitap shyǵarý, kino túsirý máselesin qolǵa alý qajettigine toqtaldy.
«Alashtyń 100 jyldyǵyna durystap daiyndalýymyz kerek. Qazir eń bastysy, jaqsy jospar qurýymyz qajet. Oǵan bir-eki aptadai ýaqyt alyp, durys jospar quryp, ony Elbasymen kelisip, ýaqytyn belgilegen jón. Alashtyń 100 jyldyǵy sol zamanmen qalyp qoimai, búgingi táýelsiz memleketpen bailanystyrý oryndy bolady. Alash ziialylarynyń armany, onyń oryndalǵany, táýelsiz el bolǵanymyz, osynyń barlyǵy ulttyq jáne tarihi sanany kóteretin jaqsy dúnie bolýy kerek», - dedi Imanǵali Tasmaǵambetov.
Sondai-aq, keńes barysynda Ahmet Baitursynuly murajai úiin memlekettik menshikke berip, onyń mártebesin respýblikalyq deńgeige kóterý, ǵalymnyń ǵylymi eńbekteriniń 10 tomdyǵyn jaryqqa shyǵarý máselesi qaraldy.
Imanǵali Tasmaǵambetov Ahmet Baitursynov jáne «Alash» qozǵalysy jóninde derekti film túsirý máselesin jedel túrde qolǵa alý qajettigin atady.
Keńes qorytyndysy boiynsha, vitse-premer Imanǵali Tasmaǵambetov QR Mádeniet jáne sport ministrine Alash Orda úkimetiniń qurylýy men qalyptasýyna atsalysqan ult ziialylarynyń ómirbaianyn zerttep, olar jóninde kórkem ómirbaiandyq kitap shyǵarýdy jáne Ahmet Baitursynov ǵylymi eńbekteriniń 10 tomdyǵyn basyp shyǵarýdy tapsyrdy.
Aldaǵy ýaqytta Ahmet Baitursynuly murajai úiiniń ǵimaraty respýblikalyq mańyzy bar Tarih jáne mádeniet eskertkishteriniń memlekettik tizimine engiziletin bolady.
QR Bilim jáne ǵylym ministrine murajai úidi memlekettik menshikke alý jáne ony A. Baitursynov atyndaǵy Til bilimi institýty janynan A. Baitursynuly murajai úii – ǵylymi ortalyǵy retinde qurý tapsyryldy.
Aita ketsek, ótken aptada QR Premer-ministriniń orynbasary Imanǵali Tasmaǵambetov Almaty qalasyna is-sapar aiasynda Ahmet Baitursynuly murajai úiinde bolyp, onyń jumysymen tanysqan edi.
"Ult aqparat"
