Foto: pexels.com
Halyqaralyq kinologiialyq federatsiia (FCI) tazyny aldyn ala resmi tuqym retinde tanyp, Qazaqstannyń tuqym standartynyń iesi retindegi mártebesin bekitti, dep habarlaidy "Ult aqparat" federatsiiaǵa silteme jasap.
Qazaqstan Respýblikasy Prezidenti is basqarmasynyń saitynda sheshimdi FCI Bas komiteti qabyldaǵany jáne bul tazyny qazaq tuqymy retinde halyqaralyq deńgeide tolyq tanýǵa deiingi negizgi ári sońǵy kezeń ekeni naqtylanady.
"Búgin sizderdiń el jáne biz úshin tarihi kún. FCI Standarttar komissiiasy men FCI Ǵylymi komissiiasy uzaq protsedýradan keiin tuqymdy qabyldaýdy Bas komitetke usyndy. Quttyqtaimyn! Alda sizdi 10 jyldyq jumys kútip tur. Osy ýaqyt ishinde FCI Ǵylymi komissiiasy talap etetin tuqym boiynsha densaýlyq synaqtary, tirkelgen kúshikter týraly statistika jáne basqa da málimetter jinalýy kerek. Itterdiń densaýlyǵy men ál-aýqaty qazirgi ýaqytta eń mańyzdy máselelerdiń biri. FCI Qazaqstandaǵy tuqymnyń júieli damýyn qadaǵalaityn bolady", – dedi FCI prezidenti Tamash Iakkel, Bas komitettiń sheshimin túsindire otyryp.
Qazaq it tuqymdaryn saqtaý jáne olardyń halyqaralyq deńgeide moiyndalýy máselesi 2022 jyldan bastap memleket basshysy Qasym-Jomart Toqaevtyń tapsyrmasy boiynsha QR Prezidenti is basqarmasynyń qamqorlyǵynda.
Ókiletti organ retinde Ekologiia jáne tabiǵi resýrstar ministrligi belgilengenin vedomstvo eske saldy.
"Keiingi eki jylda aýqymdy jumystar júrgizildi: tiisti zańdarǵa ózgerister engizildi, tazynyń standarty bekitildi, ǵylymi zertteýler, asyl tuqymdy qaraýlar men kórmeler ótkizildi", – delingen jariialanymda.
Tuqymdardy tirkeý (taný) tek Halyqaralyq kinologiialyq federatsiiada (FCI) tolyqqandy músheligi bar ulttyq kinologiialyq uiymdar arqyly júzege asyrylady.
