Tarazda 19 jastaǵy boijetkendi nekege turýǵa májbúrleý maqsatynda alyp qashqan úsh azamatqa qatysty sot úkimi shyqty, dep habarlaidy ult.kz.
Oqiǵa ótken jyldyń qazan aiynda bolǵan. Tergeý málimetinshe, Almaty oblysynyń úsh turǵyny Jambyl oblysynyń 19 jastaǵy turǵynyn kúsh qoldanyp alyp ketken.
Atalǵan derek boiynsha politsiia QR Qylmystyq kodeksiniń 125-1-baby 2-bóliginiń 1) jáne 4) tarmaqtary boiynsha sotqa deiingi tergep-tekserýdi bastaǵan.
Tergeý barysynda jábirlenýshiniń alyp qashýdy uiymdastyrǵan azamatpen bes jyldan astam ýaqyt boiy jaqyn qarym-qatynasta bolǵany anyqtaldy. Alaida boijetken birneshe ret turmysqa shyǵýdan bas tartqan. Soǵan qaramastan er adam tanystaryn tartyp, qyzdy alyp qashýdy uiymdastyrǵan.
Kúdiktiler aldyn ala sóz bailasyp, kúndizgi ýaqytta jábirlenýshini kúsh qoldanyp alyp ketken.
Sot otyrysynda aiyptalýshylardyń kinási tolyq dáleldendi. Taraz qalasynyń №2 sotynyń úkimimen olar adamdy nekege turýǵa májbúrleý maqsatynda alyp qashqany úshin kináli dep tanyldy.
Qylmystyq kodekstiń 63-baby qoldanylyp, úsh sottalýshynyń árqaisysyna úsh jyl merzimge bas bostandyǵynan aiyrý jazasy taǵaiyndaldy.
