Qazaqstanda 9 bank taratylyp jatyr. Atalǵan banktiń salymshylary ózderine tiesili qarajatyn 3 shildege deiin ala alady. Bul týraly QazAqparat Qazaqstannyń depozitterge kepildik berý qoryna silteme jasap habarlaidy.
Taratylyp jatqan bankterdiń salymshylaryna kepildik berilgen ótem somasynyń 98%-dan astamy tólengen. Bul shamamen 113,1 mlrd teńgeni quraidy.
Qazaqstannyń depozitterge kepildik berý qory kepildik berilgen ótemdi tóleý jáne talap etilmegen ótem somalaryn Biryńǵai jinaqtaýshy zeinetaqy qoryna aýdarý tártibin túsindirdi.
«Taratylatyn segiz banktiń salymshylary ózderine tiesili ótem aqshalardy sońǵy kúnin qosa alǵanda 2022 jyldyń 1 mamyryna deiin ala alady. Bul «Valiýt-Tranzit Bank» AQ, «Qazinvestbank» AQ, «Delta Bank» AQ, «Eksimbank Qazaqstan» AQ, «Qazaq Banki» AQ, «Astana Banki» AQ, «Tengri Bank» AQ jáne «AsiaCredit Bank (AziiaKredit Bank)» AQ salymshylary. «Capital Bank Kazakhstan» AQ litsenziiasynan keiinirek aiyrylǵandyqtan, onyń salymshylarynyń kepildik berilgen ótemdi sońǵy kúnin qosa alǵanda biylǵy jyldyń 3 shildesine deiin alýǵa múmkindikteri bar», - delingen habarlamada.
Ótem alýǵa ótinishti dástúrli tásilmen de Tólemderdiń elektrondyq portaly (TEP) arqyly onlain túrinde de berýge bolady.
Tólem merzimi aiaqtalǵan soń, talap etilmegen ótem somalary salymshylardyń BJZQ-da ashylǵan, erikti zeinetaqy jarnalaryn esepke alýǵa arnalǵan jeke zeinetaqy shottaryna aýdarylady. Taratylatyn segiz banktiń klientteri ótem aqshalarynyń BJZQ-ǵa aýdarylýyn aǵymdaǵy jyldyń 31 mamyryna deiin , al «Capital Bank Kazakhstan» AQ salymshylary 2 tamyzǵa deiin kúte alady.
Al tólem merzimin dáleldi sebeptermen ótkizip alǵan salymshy jazbasha ótinishpen Qorǵa tikelei júgine alady.
