Foto: primeminister.kz
Jol boiyndaǵy servis obektileri standarttarǵa sai kelmeidi. Bul týraly búgin Úkimet otyrysynda Premer-Ministr Álihan Smaiylov aitty, dep habarlaidy Kazinform agenttigi.
«Halyqaralyq júk tasymalyn júzege asyrýǵa ruqsat beretin blankilerdi bólýde de problemalar bar. Mundai ruqsattardy biz kóptegen memlekettermen paritet negizinde alyp otyrmyz. Otandyq júk tasymaldaýshylarǵa blank berý mehanizmin qaita qarap, olarǵa artyq talap qoimaý qajet», - dedi Premer-Ministr.
Úkimet basshysy jol boiyndaǵy servis boiynsha da suraqtar bar ekenin aitty.
«Máselen, Batys Eýropa – Batys Qytai tranzittik dáliziniń iske qosylǵanyna 5 jyldan assa da, jol boiyndaǵy servisti áli kúnge deiin damyta almai kelemiz. Bul týraly birneshe ret aityldy, tiisti tapsyrmalar berildi, biraq ózgergen eshteńe joq. Halyqaralyq joldar men ishki marshrýttardyń bárinde de osyndai jaǵdai», - dedi Álihan Smaiylov.
Onyń atap ótýinshe, servis obektileri úshin jol boiynan jer ýchaskesin berýdi ákimdikter sozyp jiberdi.
«Osyǵan bailanysty, infraqurylymnyń damýy toqtap tur. Onyń ústine, biz Ulttyq standartty baiaǵyda qabyldap qoidyq. Onda jol boiyndaǵy servis obektileri men kórsetiletin qyzmetterge qoiylatyn talaptar belgilengen. Bul qosymsha tranzit kólemin tartýǵa múmkindik berer edi. Alaida, servis obektileriniń kóbi bizdiń standartqa sáikes kelmeidi», - dedi Úkimet basshysy.
