Flamingo Air áýe kompaniiasynyń Cessna 402 ushaǵy 10 shildede Bagam araldaryndaǵy Nassaýdan Soltústik Andros aralyna qysqa reis oryndaý kezinde apatqa ushyrady. Shamamen 20 minýtqa josparlanǵan áýe reisi ushaq qonýǵa az ýaqyt qalǵanda apatpen aiaqtalǵan, dep habarlaidy ult.kz The Voice basylymyna silteme jasap.
Áýe kompaniiasy apat bolǵanyn rastady jáne tergeý organdarymen birlesip jumys isteýge daiyn ekenin málimdedi.
Ushaq apatynan ushqysh Franklin Kembridj jáne toǵyz jolaýshy qaza tapty. Qaza bolǵandardyń arasynda Kýinton Maiers, Mateo Ýinder, Rashad Storr, Djovanni Makkenzi, Trevis Djonson, Makaro Rolle jáne DJ Fresh (Melvin Henfild) bar ekeni anyqtaldy.
Ushaqtyń borttyq jýrnalyna sáikes, qaza tapqandardyń arasynda The Pond Band mýzykalyq tobynyń bes múshesi bolǵan. Olardyń qatarynda top jetekshisi Trevis Djonson men klavishnigi Djovanni Makkenzi de bar. Keiin top múshesi Shanisi Miller ushaq bortynda bolmaǵanyn jáne aman qalǵanyn habarlady.
«The Pond Band úshin bul tek bizdiń topqa ǵana emes, búkil elge tigen aýyr soqqy boldy. Biz toptyń negizi, júregi ári jany bolǵan bes múshemizden aiyryldyq. Qalpyna kelý joly uzaq ári qiyn bolady. Sondyqtan bizden sál ýaqyt, keńistik, qoldaý men duǵa ǵana surai alamyz», – dedi ol.
Jergilikti biliktiń málimetinshe, ushaq qonýǵa az ýaqyt qalǵanda butaly jerge qulaǵan. Apat ornynan jan-jaqqa shashylǵan ushaq bólshekteri men órttiń izderi tabyldy.
Qaiǵyly oqiǵa Bagam araldarynyń táýelsizdiginiń 53 jyldyǵy atap ótilgen kúni bolǵan. Premer-ministr Filip Breiv Devis bul kúndi qaraly kún dep atady. Sondai-aq ol zardap shekkenderdiń biriniń aýyr halde aýrýhanaǵa jetkizilgenin, alaida dárigerler onyń ómirin saqtap qala almaǵanyn habarlady.
Áýe apatynyń naqty sebebi ázirge belgisiz. Bagam araldarynyń Áýe apattaryn tergeý basqarmasy tergeý jumystary bastapqy kezeńde ekenin málimdedi.
«Tergeý jumystary bastapqy kezeńde. Qazirgi ýaqytta qolda bar kez kelgen aqparat aldyn ala málimet bolyp sanalady jáne qosymsha dálelder alynip, taldanýyna qarai ózgerýi múmkin», – delingen vedomstvo málimdemesinde.
Qaiǵyly oqiǵadan keiin Bagam araldarynyń Energetika, kommýnaldyq qyzmetter jáne aviatsiia ministrligi saqtyq sharasy retinde Flamingo Air áýe kompaniiasynyń áýe tasymaldaýshysy retindegi sertifikatynyń qoldanylýyn ýaqytsha toqtatty.
Sol kúni áýe kompaniiasynyń ushaǵyna qatysty taǵy bir oqiǵa tirkeldi. Nassaýdan Maiagýanaǵa baǵyt alǵan áýe kemesi ushqyshtyń reistiń qaýipsizdigine kúmán keltirýine bailanysty ushyp shyqqan áýejaiǵa qaita oralǵan. Ushaq qonǵannan keiin órtenip ketken, alaida eshkim zardap shekken joq. Bul oqiǵa boiynsha da tergeý júrgizilip jatyr.
