Brinjaktyń aitýynsha, qazir Kievten kóp adam ketip jatyr.
"Kievtiń barlyq kóshesinde keptelis. Qazir men metroǵa bara jatyrmyn. Kóshede bireýler chemodanmen ketip barady, bireýler itterin qydyrtyp júr. Árine, dúrbeleń bar. Sebebi, bankomattarda kezekte turǵan adam kóp. Harkovta da osyndai jaǵdai. Dostarym adamdar jappai ketip jatqanyn jazdy. Kiev meri kez kelgen ýaqytta qorǵanatyn jerge kirý úshin chemodan daiyndap qoiýdy ótindi", - dep qosty ol.
Ekaterina Kabakova Odessa ortalyǵyna jaqyn jerde turady. Ol búgin jarylys dybysynan erte oianǵanyn aitady.
"Búgin tańǵy saǵat 5.00-de jarylys dybysynan oiandym, ortalyqtan alys emes jerde turamyn. Áskerler strategiialyq nysandarǵa oq jaýdyrdy degen aqparat bar. Odessa, Kiev, Harkov qalalarynda jarylys boldy. Sirenalar qosylmaǵan. Biz áli úide otyrmyz, qazirshe tynysh. Ary qarai ne isteý kerek bilmeimin, túsiniksiz. Men qujattardy jaqyn jerge daiyndap qoidym. Ýkraina ústimen ushý toqtatyldy", - dedi ol.
Kabakova Odessada soǵys jaǵdaiy engizilgenin, qalada desanttyq áskerler ornalasqanyn aitty.
"Resei DHR men LHR moiyndaǵannan keiin búkil Ýkrainadaǵy siiaqty Odessadaǵy ómir ózgerdi. Halyqta mazasyzdyq pen úrei paida boldy. Qazir áskerde týystary bar nemese áskeri jastaǵy týystary bar halyq qatty alańdap otyr.
Qala biliginen qosymsha jarlyqtar bolǵan joq. Er adamdar ózderi aýmaqtyq qorǵanys otriadtaryna jazylyp jatyr. Olar rezervke qoiylady, iaǵni tótenshe jaǵdai nemese áskeri jaǵdai engizilse, osy otriad barady. Olar qalany kúzetedi. Jazylǵandar óte kóp, biraq olar jai ǵana rezervte tur. Jaqsy jańalyq bombadan jasyrynatyn jerlerdiń tizimi aityldy. Eger birdeńe bolsa, adamdar qaida barý kerektigin biledi. Jalpy kóńil kúi turaqsyz, ýaiymǵa toly", - dep qosty ol.
Al, jergilikti Telegram arnalary Odessadaǵy janar-jaǵarmai quiý beketterinde kezek kóp ekenin habarlady. Bankomattardan 1000 griven ǵana alýǵa bolady, ol jaqta da tolassyz kezek. Mektepter qashyqtan oqytý rejimine aýysty.
