«Tańbaly tas» memlekettik tarihi-mádeni jáne tabiǵi qoryq mýzeiine kelgen týristi kirý úshin alynatyn aqy men qoiylǵan qorshaý tańǵaldyrdy. Sonymen qatar ol jumys istemeitin ájethanaǵa shaǵymdandy, dep habarlaidy QazAqparat.
«2022 jyldyń 27 naýryzynda Ile ózenine jaqyn ornalasqan Tamǵaly-tasqa bardym. Bul jerge jyl saiyn kelip turamyn. Keshe qoiylǵan qorshaý men kirý úshin alynatyn aqy (adam basyna 500 teńge) meni tańǵaldyryp, jaǵymsyz áser qaldyrdy.
Usqynsyz kabinadan shyqqan bir adam ózin tanystyrmai, jeke kýáligi men beidjin kórsetpesten kirý aqysyn talap etti. Alaida, onyń qolynda tólemaqy alý quqyǵyn beretin qujaty boldy. Ol maǵan fiskaldy túbirtek bergen joq. Sebebin elektr men internet joq dep túsindirdi. Maǵan bilet usyndy. Sonymen qatar, ol maǵan túbirtekti Uzynaǵashtaǵy kompaniianyń keńsesinen baryp alýdy usyndy», - dep jazady Facebook qoldanýshysy.
Onyń aitýynsha, barlyq ǵimarat, sonyń ishinde inspektor otyratyn kúzet orny, dárethana (jumys istemeidi), qorshaýy qoryqqa sai bolýy kerek.
Qoryq-mýzeiiniń baspasóz qyzmeti ár pýnkt boiynsha jaýap berdi.
«Fiskaldy túbirtek boiynsha, biz túbirtekterdi qajet etetinderdiń barlyǵyna beremiz. Ókinishke orai, sol kúni ol jerde kassa apparaty jumys istemedi. Al bul kisilerge eki bilet usynyldy. Baǵasy jazylǵan preiskýrant kórsetildi. Bizdiń qyzmetker qonaqtarǵa Uzynaǵashtaǵy keńsege baryp tekserýdi usynǵan joq. Ol keńsege qońyraý shalyp, chekti elektrondy túrde ala alatynyn aitty. Sondai-aq aýmaqqa kirý baǵasy 2018 jyldan beri 500 teńge.
Kólikke keler bolsaq, Bul tranzittik jol. Aýyl sharýashylyǵy qyzmetkerleri men Tótenshe jaǵdailar ministrliginiń mamandaryn kirgizbeýge qaqymyz joq.
Dárethana boiynsha, ol áli tolyqtai iske qosylmady. Sebebi, sý men jaryq tartylǵan joq. Onymen jumys istep jatyrmyz.
Aýmaqty jabdyqtaý josparda bar. Alaida ony bir aptada jóndei almaimyz, sebebi qarjylyq shyǵyn ońai emes. Mýzeige kirýge alynatyn sol 500 teńge nysandy abattandyrýǵa ketedi: ákteýge, syrlaýǵa, tazalaýǵa», - dep jaýap berdi mýzeiden.
Sondai-aq qoryq-mýzeiine aiyna orta eseppen 10-20 adam keletini aityldy. Byltyr munda 1500-ge jýyq týrist kelgen.
