© facebook/Zakonoposlýshnyi grajdanin
Birneshe ai boiy únsiz ketken Soltústik Qazaqstan oblysy Energetika basqarmasynyń basshysy Baqyt Iliiasov tergeý izoliatorynda bolyp shyqty. Onda ony "Habar" telearnasynyń túsirý toby baiqap qalǵan. Bul rette sheneýniktiń ustalýyna qatysty ázirge eshbir vedomstvo resmi pikir bergen joq, - dep habarlaidy Tengrinews.kz agenttigi Petropavlovsk.news saityna silteme jasap.
Iliiasov buǵan deiin Qyzyljar aýdany ákiminiń orynbasary bolǵan, keiin birneshe jyl Petropavl qalalyq turǵyn úi-kommýnaldyq sharýashylyq, jolaýshylar kóligi jáne avtomobil joldary bólimi basshysynyń orynbasary qyzmetin atqardy. Byltyr qazanda Soltústik Qazaqstan Energetika basqarmasynyń basshysy boldy.
Basylym málimetinshe, osy ýaqyt ishinde Iliiasov baspasózge ashyq bolǵan, turǵyn úi-kommýnaldyq sharýashylyq qurylymynyń ártúrli máselelerine qatysty únemi pikir bildirip júrgen. Alaida biyl tamyzda sheneýnik kenetten aqparat keńistiginen kórinbei ketken.
Qylmystyq is týraly qaýeset tez taraǵan, biraq eshkim eshteńeni resmi rastaǵan joq. Sybailas jemqorlyqqa qarsy komitet te eshqandai pikir bildirmegen.
"Qazaqstandaǵy prezident sailaýynda "Habar" telearnasynyń túsirý toby Petropavldyń tergeý izoliatoryndaǵy daýys berý barysyn túsirip alǵan. Daýys berýshilerdiń biri - Baqyt Iliiasov... Daýys berý barysy týraly videony jýrnalist Tólegen Imanov "Zakonoposlýshnyi grajdanin" tobynyń paraqshasynda jariialady", - dep jazdy basylym.
"Energetika basqarmasynyń qazirgi basshysy tergeý izoliatoryna qalai túskenin áli bilmeimiz. Tiisti organdar pikir bildiredi dep kútemiz", - delingen jazbada.
