Senat depýtaty Talǵat Musabaev tilshilerge Qyzylorda oblysynda tikushaq apatynyń mán-jaiyn aityp berdi, dep habarlaidy QazAqparat tilshisi.
«Qorǵanys ministrliginiń ótkizgen arnaiy jattyǵýy aiasynda tikushaq áýege kóterilgen. Bul top Aqtaýdan Shymkentke qarai baǵyt alǵan, sondai-aq onyń osy aralyqta Beineýde, keiinnen «Krainii» (Baiqońyr) áýe ailaǵynda qonýy josparlanǵan. Baiqońyrdan ushyp shyqqannan soń birneshe minýttan keiin dispetcherlik qyzmettiń radiolokatorlaryndaǵy tikushaqtyń belgisi joǵalyp ketken. Keiinnen tikushaqtyń apat bolǵany anyqtaldy», - dedi Talǵat Musabaev Senattyń jalpy otyrysynan keiin tilshilerdiń saýalyna jaýap bere otyryp.
Sonymen qatar tikushaqtyń ushýy qiyn meteorologiialyq jaǵdaida ótkenin atap ótti.
«Bul kúrdeli áýe sapary erekshe tańba qaldyrady. Men ony ushqysh retinde aityp otyrmyn. Osyndai qiyn jaǵdaida ushý qandai aýyrtpalyq túsiretinin jaqsy bilemin. Ekipaj barlyq qajetti sharany qabyldady. Tehnikanyń ózindik ereksheligi bar, iaǵni aviatsiia - ol eń qiyn kóliktiń túri. Sondyqtan mundai oqiǵalar ekipajǵa bailanysty emes qaiǵyly oqiǵalar bolady», - dedi senator.
Osy oraida ol qylmystyq is aiasynda erekshe tergeý amaldary júrgiziletinin, Qorǵanys ministrliginiń arnaiy komissiiasy jumys istep jatqandyǵyn atap ótti.
Eske sala ketsek, QR IIM TJK baspasóz qyzmeti buǵan deiin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.
Apat saldarynan tikushaq bortyndaǵy 13 adam qaza tapty.
